دنيا تمشي مجقلبة !!!! طاح حظ هالزمن الأغبر !!!!!

التفاصيل

تم إنشاءه بتاريخ الأحد, 01 أيلول/سبتمبر 2019 10:22

كتب بواسطة: سيف الدين الألوسي

                       سيف الدين الألوسي

دنيا تمشي مجقلبة !!!! طاح حظ هالزمن الأغبر !!!!!

اليوم زهگانه روحي من الانترنت والأخبار المملة ،، گلت بلكي أشوف فد برنامج بي خير لو فيلم زين بالتلفزيون !!!
كلبت الام بي سيات كلها فطيرة والام بي سي ٢ مخلية فيلم خيال علمي ،، واني بليه خيال علمي هله هله !!! هل مرة خيال علمي وكائنات فضائية !!!!
ورجعت على دبي ريسزنغ ،، طلع سباق مال بعران ، والبعران دترول وتتفل بهل الحر ،، وحيث الزمال يبول دم !!!!
رجعت على اللبنانيات ،، لو طبخ لو مسلسلات ووحدة مصادقة كل مراتب الفيلق الخامس ورجلها حاير !! وممخلية حصره بگلب أحد !!! ومن هل التفاهات وطيحان الحظ !!
رحت على العديد ،، ومعظمها دينية وطائفية من كل الان الانواع والاشكال وانا بعيد جدا عن هذه المواضيع !!
ومن ثم ذهبت على القنوات الاخبارية الاجنبية والعربية وكلها مركزة على الحروب وطيحان الحظ !!
رجعت على العراقيات ،، ولو برامج تطلع وحده تبجي وشلون مدينطونه شكر بالحصة ،، وهي يوم الانتخابات تركض هيه وعبايتها تنتخب نفس الشكولات ،، لو اغاني سخيفة وتدبج لو اخبار تخلي الواحد يتخبل رسمي ،، ولقاءات مع وجوه ممسوخة وقسم متخجل من نفسها !!!!! وحتى تجعل المواطن المشاهد يخجل من نفسه !!!
رجعت على الرياضية وكلها لعبات لدوريات الامارات والسعودية والخليج وعلى اساس الدوري الانكليزي والاسباني والايطالي والالماني !!
كلت هذا نايل سات وبيه الف وكسر قناة ،، ماكو بيه فد قناة بيها خير وفد برنامج مفيد !!!
نستفاد منه !!!
فتحت قناة ام بي سي واذا بجبار ابو الصالنصات العفو المطربة الحسناء وفيلسوفة الموسيقى وخبيرة الاصوات دتغني ،، ووراها فرقة موسيقية من اكثر من مئة عازف وامام الفرقة مايسترو !!! والفرقة تدك في وادي والمغنية الخليجية تجوعر وتصرخ في وادي !!!
والجمهور الخليجي متونس وديركص ومنهم منقبات !!
ترحمت على أيام الذوق والطرب الاصيل ، وعلى أم كلثوم ووردة وسعاد محمد وفائزة أحمد وسليمة باشا وعفيفة اسكندر وزهور حسين واحلام وهبي والشحروة وعلى ابو وحيد وعبد الحليم وناظم الغزالي وسيد مكاوي وغيرهم ،، وعلى الفرقة الماسية أم عشرين عازف وهي تعزف للكبار !!!
رجعت ،، كلت احسن شي الناشيونال جيوغرافي ،، خلي اتفرجها !!
شفت أسودي ابو خميس مجطول ومرته اللبوة دتفركله وهو مرتاح ،، وداير مدايرهم الاشبال ديلعبون ،، وناس تضرب ناس مثل شقه ولد الفگر !!!
واسودي يكلهم كعدوا لو رح يجيكم نعال هسه !!!!!
بقيت صافن على أسودي ملك الغابة المطعوج ،، وكلت ويه روحي
من طاح حظ هذي الدنيا الغبرة ،، لا ساوينه الشكولات والدمگجية والمغنيات وجبار ابو الصالنصات ولا أسودي ملك الغابة !!!!
ورجعت ورثت چكارة وطلعت بره اشتم هوه رب العباد الطيب بعمان واني احچي ويه روحي !!!!!!!!
تحياتي للجميع