حچاية التنگال ٣٩٠

التفاصيل

تم إنشاءه بتاريخ الإثنين, 16 أيلول/سبتمبر 2019 08:16

كتب بواسطة: د.سعد العبيدي

                           د.سعد العبيدي

حچاية التنگال ٣٩٠

محمود راح للطبيب... سالم السكرتير، گله السرة بعد شهر... هاي (٢٥) ألف... انتظر أدخلكْ بدل واحد من المتأخرين... سالم راد يطلع جنسية لإبنه... عريف محمد گله، ابنك مو هنا... أدري هاي(٥٠) ألف بس إخْصُملياها... لا ميهَ... ماشي بس طلعها... عريف محمد مستحق ترقية راح على النقيب. سيدي بلكت تحط أسمي بجدول الترقية تره كلهم غلبوني... بس انت ما مستحق... سيدي هاي المليون جاهزة... خوش خليني أشوفلك چاره...
النقيب راد يعين زوجته، قابل أستاذ كاظم بالوزارة... ها سيادة النقيب؟... أريد أعين مرتي يَمْكمْ. عندك تأييد من حزب، حتى ندخل الاسم بالقرعة على خمس وظائف والمتقدمين (5) آلاف وانت أعرف بالقرعة...أعرف. وهذا نص الدفتر الي طلبتهَ جاهز...انتظر الامر الوزاري هالاسبوع.
كاظم يتمنى يطلع وفد راح على استاذ عادل... أستاذ أكو وفد لفرنسا، بلكت تخلي اسمي بيه... الوفد فني وانت ادارى، اشلون ترهم... استاذ انت المدير العام وكلها بيدك، وهاي هم مخصصات الايفاد انطيكياها ليجدام وفوگاها بوسه... ماشي راح أضيف اسمك.
عادل راجع الوزير على تثبيته وگال معاليك تدري باخلاصي إلكم، وآني منكم وبيكم، جاي أريد تثبتني بمنصب مدير عام، وجواد خوما أحسن مني وثبتوه، على الأقل آني عندي دكتوراه. عادل الدكتوراه مالتك كلك، وانت تشتغل بعقد، ميصير ... معاليك هو بس آني، أعددلك إشگد ثبتوا گبلي... لا تعد ولا تدوخني، نسق وية اللجنة الاقتصادية بالحزب وهي تحدد الكلفة، آني معليه... لعد منو الي عليه... انت تعرف وآني أعرف وربك يعرف طاسة ببطن طاسة وبالبحر ركاسه!.