منو بحالكم ؟؟!!

التفاصيل

تم إنشاءه بتاريخ الثلاثاء, 10 كانون1/ديسمبر 2019 18:06

كتب بواسطة: سيف الدين الألوسي

                           سيف الألوسي

منو بحالكم ؟؟!!

لو تمشون بنص السوك محد يعرفكم !!!! مسوين بوخة وقيمة وقدر بالگوه لانفسكم !!!
نماذج ما انزل الله بها من سلطان ،، كل واحد وراه عشر سيارات حماية ،، وانت لا تعرف منو هذا او هذه النمونة ،، كاعد نافخ نفسه كأنه السلطان عبد الحميد او الخليفة هارون الرشيد او كأنه صقر قريش النسخة الثولة !!!!!!!
هذه السيارات الحديثة كلها من الانواع الغالية وقسم منها مصفحات اي لا تقل قيمتها السوقية عن ١٠٠الف دولار ،، ولنحسب بالارقام كم يكلف الموكب لكل نمونة من سيارات مبذرة من خزينة الدولة ،، عشر سيارات مضروبة باربعين الف دولار لكل سيارة حماية تساوي ٤٠٠ الف دولار مضيفا لها سيارة النمونة عبقري زمانه ،، فقط في موكب السيارات هناك مبلغ نصف مليون دولار ،، اي باموال بموكبين من مواكب هل الشكولات محرومي النعمة والجاه والخلق ذوي العقد النفسية المتجذرة ،، تبنى مدرسة نموذجية ،،،،،، وعشر مواكب لهذه النمايم نبني مستشفى محترم صغير مجهز تجهيزا كاملا ،، ولو نحسب عدد هؤلاء النمايم المجهولين والغير معروفين والاموال المبعثرة على مواكبهم ،، لخرجنا بمليارات الدولارات والتي تكفي لبناء مئات المستشفيات والمدارس ودور العجزة والايتام والارامل النموذجية ،، علما ان معظم تلك السيارات تسقط بعد سنوات قليلة وتذهب فلوسها هباءا منثورا ،،،،
الرجل المحترم ذو الكفاءة والشبعان اذا ركب بايسكل عتيك واذا ركب سيارة بسيطة او ركب رولزرويس يبقى نفس الشئ وبنفس الاحترام لذاته وضميره اولا وللناس ثانيا !!!!
لا الاموال الحرام ولا المظاهر الكاذبة ولا الحمايات تسوي الواحد ادمي ومحترم ولا المنصب يسوي اوادم وكما يفكر هؤلاء معدومي الجاه ،،، نوري باشا چان بطرك سيارة ملك شخصي رقمها ٢٠ بغداد يقودها شرطي والشهيد الملك فيصل الثاني بطرك سيارة يمشي امامها ماطور سيكل يقوده شرطي ،،، وكذلك عبد الكريم قاسم ومن لحقه من رؤوساء ولغاية فد واحد ،،، واذا ييجي الاجل للانسان فلا تمنعه سيارة محصنة ولا حماية ولنا في التاريخ القريب تجارب من كنيدي وانور السادات وتشاوتشيسكو وغيرهم !!!! والله يرحمك بالف رحمة الشهيد دكتور رياض ابراهيم الحاج حسين وزير الصحة عندما كان يذهب بسيارته الكفاءات لوزارته او يكعد بالصدر يم سايق سيارة الدولة ،، وممكن اسطر الالاف من مسؤولي الماضي اكتفوا بسيارة وسايق وهم باعلى واهم المناصب وهم معروفين ومعرفين للمجتمع اكثر مليون مرة من نماذج القرن الواحد والعشرين الاحادية الخلية الطفيلية !!!!!!!!!!
ويأتيكم الموت ولو كنتم بابراج مشيدة ،،،،،،،، بس جيب اليفتهم مو الدثو !!!!!
حيفن عليك يا عراق وحيفن على فلوسك !!