چم دوب..

التفاصيل

تم إنشاءه بتاريخ الجمعة, 13 كانون1/ديسمبر 2019 16:27

كتب بواسطة: ميسون نعيم الرومي

ميسون نعيم الرومي

چم دوب..

چم دوب.. الموت ابديرتنه..
انعوش انشيل اتزف انعوش
اوچم دوب ..
ننحب نبچي .. انصب ادموع
چم دوب ..
انونون والحزن اينوح
چم دوب ..اوبينه ايحصدون
مرفوع العلم اوما طاح
والنخل اتهدل سعفه ..
موجوع ايصيح اويه الريح
يرصد يتورج عَ الكاتل ..
والگاتل .. خو معروف
چم دوب ..
او ننعي الموت المنحوس ..
عَ الديره الطش .. ابلايه احساب
يتنگه اوياخذ احباب
والدم الغرّگ بالناس ..
نوبه ابكاتم ..
نوبه ارصاصه البلراس
چم شاب الطاح اوباگوا حلمه؟
چم ام انفجعت .. ملتاعه اتنعي
اوچم احبيبه اتلوع ابسكته ..
وابلا حس
اوچم شاب الضاعت ايده اورجله
اوعينه الراحت متشوف
اوچم ايتيم حاير بمره ..
والمستقبل ما معروف ..
ابدمعة عينه خبزه ايدوف
والشط امضيع لجروف
چم دوب ..
تتحنه الگاع اوبالدم
يا جرح الخزن .. ما يلتم
ضعنه
ضعنه .. اوضيعنه الساسه
والساسه التهدينه الموت
متحزم خيرهم حوت..
يتمهزل واحدهم ما مهتم
يسگينه العلگم والسم
يا ويل اوياويل
يا ويل الظالم يا ويل
باگوه الوطن ابظلمة ليل
يا ليلچ طول .. يا بغداد
هبت ولدچ كلهه اليوم
مـَـتخاف .. اسباع الأبدا مـَـتهاب
هذا اليوم .. اليوم احساب
والوطن الضايع ينعاد
شبان الثوره الأمجاد
ريحان ايخضر واوراد
منصوره انت يا بغداد
منصوره ابولدچ يا بغداد
---------------
13 / ديسمبر /2019
ســــتوكهولم