عيد الحب ،، ما اعرف حب ابيض لو احمر لو شمسي قمر !!!!

التفاصيل

تم إنشاءه بتاريخ الثلاثاء, 18 شباط/فبراير 2020 11:04

كتب بواسطة: سيف الدين الألوسي

                          سيف الدين الألوسي

عيد الحب ،، ما اعرف حب ابيض لو احمر لو شمسي قمر !!!!

رب الرومانسية !

أول مرة أسمع بعيد الحب سنة ١٩٩٤ ،، چنه نعرف عيد المعلم وعيد الشجرة وعيد الام وعيد نوروز وعيد السينما وعيد الطالب ، وعيد الحلاقين ، وعيد العمال وعيد الجيش وعيد الشرطة وبالاضافة الى الاعياد الدينية لكل الاديان ورأس السنة الميلادية والهجرية والمناسبات السياسية وغيرها ،،، هايه احنه ايامنا كلها اعياد وعطل ومناسبات ووجهنه يبچي ليل نهار ،،، لعد الله يساعد السويسريين والنمساويين وعشاير لوكسمبورغ ولخنشتاين وموناكو على حظهم الأسود المصخم ،،، وبهذه المناسبة الحمرة ومن الدب الى الگلب النفاخة الحمره والوردة الحمره ،،، سأبتكر عيد جديد براس الزواج وقشامر الاستهلاك اسمه عيد الخرف ،، وهو خاص للمخرفين والمخرفات ويتم تقديم هدايا الرجال عبارة عن باتري عتيك وقايش مبردة وجرسي مال جيش مجولك وبسطال عتيك ،، ومكناسة ووصلة مسح وجدر فافون وبابوج كلبدون للنساء !!!!!!!!!!
وتعليك چيس مي حار بعتبة باب بيت المحتفلين ، وهو يصادف ٣١ شباط على اساس راس السنة للمخرفين لانهم يتذكرون بعد شهرين ،، وهابي الزايهمر دي لنا جميعا !!!!
وزمان يا حب وره معطب الگلب وگام يشتغل تك !!!!!!!!!!!!
وبهذه المناسبة السعيدة سأذكر كيفية الاحتفال به من الحبيبين في بعض دول العالم !!!
وحبك نار !!!!
وهذه لقطات حب من بعض الدول !! بمناسبة عيد البلانتاين كولت فد ناس ،، خبطوا الحب بالويسكي !!!!!!
١- العراقي طابك بسيارته بالمطر وفاتح اغاني حبيات وديقره الغزال للحب ومشترين لفات كباب من نينوى ،، وييجوه الشرطة ويترزل ويزينوه صفر وتطلع زقنبوت الطلعه !!! ( همزين مصايره بيه ) .
٢- الهندي والحب مالته يتمشون بالشارع يشعلون بخور ،، واول ميشوفون حديقة وثيل ،، ينجطلون عليها ،، ويگمون يغنون ،، ويرجعون كلمن لبيته يهرش بظهره !! من الثيل !!!
٣- المصري يتمشى ويه الحب على النيل ،، وياخذلها نص كيلو ترمس ، وبعدين تختنك وتشمر الجيس مال الترمس بالنيل !!! ،، والحبيب يكلها ليه يا حبيبتي ،، ده الترمس مغزي !!! ليه عملتي كده ،، انا صرفت دم البي حتى اشتريه ليك يا نور عينيا !!!
٤- اللبناني ياخذ الحب ويصعد لفاريا ، ديريد يگضيه بالشاليه مالته ، المأجرها بالدين ،، وبعدين يلط بطل عرء وينام ،، وحبه تگوم تلوب وتعوفه وتطلع ويه أيلي جيرانهم للشاليه مالته !!! يشربون بيرة وياكلون كبة نية ويشوون عصافير بالفاير بليس !! وراها يگعد من النوم ويدخل عليهم ،، ويكلهم اخذوا راحتكم !!!! سوري على الازعاج !!!!
٥- الكويتي يعوف الحب تتفرج مسلسلات ، بشاليه الفحيحيل ، ويچلب بالخادمة الفليبينية ،، يبوسها وبعدين يلكف ڤايروس كورونا ويگوم يگح ويعتعت !!!
٦- الايراني يگوم يخوط هريسة ويه الحب ،، وبعدين يملي الجدر وياخذوه ويخلون عليه دهن مفرگع ودارسين وشكر وياكلون الهريسه ،، بصندوك السايبه !! اجواء حميمية !!
٧- الاميركي ، تاخذه الحب بسيارتها لبرغر كنغ ، تشتريله لفه وكوكيز وسبرايت ،، وهو مشتريلها تي شرت من اللنكات مكتوب عليه اي لوڤ يو ،، مچولح ،،، تنطيه اللفة وينطيها التي شرت ،، وهي فرحانة وتصيح أمييزينغ !! وبعدين تصير جرب من التي شرت مال الهوملسية !!
٨- الانكليزي ،، ياخذ الحب ويرحون للمكتبة ،، وبعدين يطلعون يتعشون فيش اند چبس ،،وكلمن يدفع حسابه ،، ومن يبوسها ،، يگلها اطلبج نص باون مال صاص !!
٩- الروسي والحب مالته ،، يسوون تشريب ڤودكا وفوكاه كيلو زبد ،، وتصير بطنهم اسهال ويكضوها ...... !!!
١٠- الياباني ،، يگضيها بوس عبر الماسكات وكلمن بغرفة !! ويتبادل الحب عبر كومبيوتر حبه وكومبيوتره ،، وبعدين من يوصل الكلام للجد تگوم الميموري مالتها وتعطب من الحرارة ،،وتگوم الحب تسلكلها بيضتين وتاكلها وتنام !!
١١- التركي ينطيها للحب گونية طحين ويگلها اذا تحبيني فكيلي عجين بالشيبك ، وسويللي خانم كوبكي وططر قلاغي وبورك مال لحم وجبن ،، واذا بقه عجين ماعون صو بورگي !!!
١٢- الشياب مثل حضرتي ،، يلفلفون راسهم وينجبون ينامون !!!