چم مره نموت...؟

التفاصيل

تم إنشاءه بتاريخ السبت, 13 حزيران/يونيو 2020 17:44

كتب بواسطة: ميسون نعيم الرومي

ميسون نعيم الرومي

چم مره نموت...؟

چم مره نموت
ابسكته وابلا صوت
اوجم مره نطرز الليل
نجمه ابأثر نجمه
واشكثر عبرات
مخنوگه بالصدر
ملهه الصبر
تحبس الونه
***
اشچم حلم مذبوح
ينضح ألم
ينزف حزن
وادموع تچوي بالجفن..
ضاعت ابزحمه
نصفگ الراح ابراح
جرح الگلب ما ينلاح
ضايع أملنه
***
تعلمنه الوجع
من ذاك يوم انولدنه
امغرب اوشايل گمرنه
اسنين العمر ظلمه
العين تربي للبعد
واطيور التحومي اوترد
مكسوره هدهه الوكت
من محنه تطلع محنه
***
ليوين يلتم الشمل
ليوين نبقه اونشتعل
واموجره نار البضلع
ليوين يا دنيه اونصطبر
واسنين تطحن بالعمر
ناعور يفترحاير
يغرف ابدهله اوچنه
ليوين نترجه امن الأمل چلمه
ليوين نرجه امن الفرح مزنه
ليوين .. ليوين ؟
-----------
حزيران / 2020
ســـتوكهولم