قصة صاحبنا الدبلوماسي العراقي مثل قصة عادل إمام!!

                                               

                            جلال چرمگا

قصة صاحبنا الدبلوماسي العراقي مثل قصة عادل إمام!!

أغلبنا شفنا وتمتعنا بمسرحية ( شاهد ما شافش حاجة) للفنان القدير عادل امام.

الرجل ماعنده خط ولا تلفون مع ذلك اجا انذار بقطع خط الهاتف ودفع غرامة!!.
بوكتها چنا نتعجب و نسأل : معقولة هالكلام؟؟ شنو ولاية بطيخ لو مصلحة التلفونات نايمة ورجليها بالشمس!!؟؟.
رسالة من أحد الأخوة وهو دبلوماسي يعيش ألأن في وسط أوربا وطلب عدم ذكر أسمه فقط نذكر كنيته ( أبو مصطفى).
هذا العراقي الغيور كان بأحدى سفارات العراق( بعد الأحتلال)،الأخ ومهجة القلب سعادة السفير اللي كان على رأس السفارة كان ما يحمل صفات الدبلوماسي وكل مؤهلاته انه ينتمي لحزب قوي من احزاب الأخوة النشامة والتابعة لجمهوريتهم اللا اسلامية وبس.
صاحبنا الدبلوماسي بسبب وطنيته و حبه للعراق ما عجبه الوضع كله والأهم تصرفات السفير الفلتة لذلك احترم نفسه وقدم استقالته وراح گعد بالبيت وما طلب حتى تقاعد مع العلم اله خدمة اكثر من عقدين و شوية!. وطيلة فترة خدمته كان يدفع الأستقطاعات التقاعدية.
بعد صدور قانون يسمح للمستقيل ان يطلب راتب تقاعدي ولكن مع ذلك رفض و بقى بأوربا وبعد ثمان سنوات حصل على الجنسية الأوربية.
قبل كم شهر خطر بباله ان يحصل على نسخة من الأستقالة من الدائرة الأدارية في وزارة الخارجية فقط كحق والأحتفاظ بها مع بقية اوراقه.
طلب من احد زملائه بالوزارة ان يرسل له نسخة من تلك الأستقالة والمحفوظة في اضبارته الشخصية في مقر وزارة الخارجية.
زميلة راجع الدائرة الأدارية لنفس الغرض و قام الموظف المختص بجلب اضبارة الأخ / ابو مصطفى ولكن المفاجأة لاوجود لأستقالته داخل اضبارته الشخصية ولا لوجود أمر وزاري بأستقالته!!.
زميل الأخ المستقيل سألهم:
- شنو القصة ، قانوناً عدم وجود أمر اداري بأستقالته معناه انه لايزال مستمر بالخدمة وانه لايستلم اي راتب وإلا وين الأمر الأداري؟؟ ... شتعتبرون هذه الفوضى وهذا الأمر الغريب ؟؟.
أجابه الموظف المختص: استاذ خلينا نعتبره أمبطل!!.
رد عليه زميل أبو مصطفى: اخوية شنو أمبطل هذا دبلوماسي قدير شنو قابل ديلعب طوبة وبطل من اللعب!!؟؟...الرجال لايريد تقاعد ولا اعادته للخدمة مجرد يطلب نسخة من الأستقاله وهذا حقه .
رد الموظف: والله استاذ هذه اضبارته وجنابك اطلع عليه واللي تحچي كلش صحيح بس شبيدي!!!؟؟؟.
أنا أگول:
اخوية ورا احتلال العراق من قبل الشيطان ألأكبر والجمهورية اللا اسلامية عراقنا اصبح ولاية بطيخ وهم زين ما طالبت الوزارة بأسترجاع رواتبه منذ تقديم استقالته لليوم!!.
بس هو ما مستلم اي راتب!!.
ما يهم بس اضبارته ادگول انه مستمر بالخدمة ونص!!.
عمي مشكورة يا خارجية المنطقة الخضراء ورايتكم بيضة و لابد من الاعتذار كودن شننتظر من ولاية يحكمها جهلة و اغلبية شهاداتهم من جامعة مريدي ورئيسها الزاير جخيور رعاه الله وابقاه ذخرا لجيش من الأمييين والجهلة اللي اقلهم صار يحمل شهادة ( الدگلوم!!) والماجستير ..
النه الله يا خلق الله .. وانت اخوية ابو مصطفى اسكت وخليها سكته وإلا يدفعوك عشرات الدفاتر من الدولارات دون ان تگدر تدافع عن حالك ، وحالك يصير مثل الأخ عادل امام وانذار دائرة الهواتف وهو ماعنده لا تلفون ولا هم يحزنون!!.
عاشت وزارة الخارجية العراقية ....و روح يا معلم!!...

  

  

إذاعة وتلفزيون‏



الأبراج وتفسير الأحلام

المتواجدون حاليا

730 زائر، ولايوجد أعضاء داخل الموقع