عمت عين اللي صادكتك !!!

التفاصيل

تم إنشاءه بتاريخ الثلاثاء, 25 آب/أغسطس 2020 06:47

كتب بواسطة: سيف الدين الألوسي

                       سيف الدين الألوسي

           عمت عين اللي صادگتك !!!

في هذه الايام الكسيفة جدا والكئيبة من كل نواحيها ، وضعت هذه المقالة والتي اتمنى ان تزيل بعض يسير من الكآبة التي يشعر بها معظم العراقيون اليوم ،، داخل وخارج القطر ،، متمنيا لهم جميعا السلامة والسعادة وراحة البال والامان .

نرجع الى قبل خمسة واربعين عاما اي شتاء سنة ١٩٧٥ ،،وأيام نادي المنصور السياحي والريسز ،، كنت داعيا فتاة اعرفها في الكلية الى كعدة غده بنادي المنصور ،، كان يوم احد وقبل أعياد الكريسمس بأيام ،، خرجنا من الكلية والدنيا زخ مطر وذهبنا الى نادي المنصور السياحي انا اسميه بالسياحي !!! ،، جلسنا في المطعم وخلف الدنگة الگلاس موزاييك وقرب حطب او سياج الريسز ،، كان في المطعم بويين او نادلين من القدامى ،، شليمون ومحسن الله يرحمهم ،، ولحسن الحظ كان شليمون مسؤولا عن قاطعنا الميداني ،،،. الدنيا زخ مطر وگراگيع وجو مثالي للطيران وقراءة الغزال ،، شليمون ، بطلين امستل مجورشة وكراش برتقال !!
ماكو كراش ، اكو سينالكو وببسي وتراوبي ،،، جيب سينالكو !!
شليمون تريدون مزات !! ومگابلني وگاعد او واگف عبالك علچ لزك بشعر الواحد !!!
جيب چبس وفستق عبيد بس !!!
متريدون حمص وفستق ،، لاع منريد
شليمون جاب الهنديكاب للريسز وهي جريدة الريسز ،، شرح تلعب ؟؟ بلو برد رح يغلب جوه سعد عبد الله ،،،
شليمون لخاطر الله عف عن حالي ،، هايه دينارين العبلي رقم ١٢ درة فاروق جوه تركي عطية بليس !!!
شليمون للبنية : بابا ، هازا صاحبج كلشي ميفتهم ،، اكو واحد يلعب كديشة !!
شليمون ،، العب درة فاروق ،، جديدة على السكن ،، وبليس ،، افتهمت
زين ، بس اذا خسرت ،، مو تعتب !!
لاع وروح عاد خليني اقره المعلقات !!!!!!!!!
اخذ الدينارين شليمون وراح ديكص بطاقة للفرس درة فاروق ،، ولعب بدينار درة فاروق وبنص دينار لعب رقم ستة جوه داود هاشم ،،ووبنص الاخ لعب بلوبرد رقم اثنين جوه سعد عبدالله ،،
وقبل الهدة ،، اشتاكلون
اني ،، شعدكم ،، غير تكة وكباب واسكالوب ومكس غريل ،، اكو شوربة
اي ،، كريم سوب ،،،
جيب اثنين وزبد ولوف توست ،، واثنين اسكالوب ،، بس اني اسكالوب بليه دهن
شليمون ،، عمت عينها وويها حركة غمه بالايد بوجه البنية ،،للصادتكتك ،، هذا شلون تهبيه !!
البنية تضحك !!
شليمون جيبلي بيرتين بعد وسينالكو !!
وگبت هدة الخيل وچتي درة فاروق ثانية بمسافة رقبة عن بلو برد ،،، الربع دينار او الخمسة دراهم ، تجيب ٤٥ درهم ، الدينار يجيب ١٨٠ درهم ،، اي الدينار يجيب ٩ دنانير وانا اطلب شليمون ١٨ دينار منها ثلاثة بخشيش !!
الباقي ١٥ !!
شليمون ،، روح صرف وجيب الفلوس والك ثلاثة دنانير بخشيش !!
يا بخشيش ،، انت بس خمسة دنانير ربحت ،، لعبت رقم ستة وخسر بالدينار اللاخ مالتك !!!
منو گالك ؟؟!!
اني گلت ،،، ره اجيب الاكل وبليه هجي ،، وكافي تشرب !!
جاب الاكل والاسكالوب ما بيه بتيته ، بس بيتنجان مگله !!!
شليمون ،، ليش الاسكالوب ملطلط ،، همين خسرتنه وهمين قزلقرد ملطلط وسينالكو حار من الصندوك !!!
اگطع الحساب من تكت درة فاروق !!!
ام مداج ،، صدگ عمت أيين اللي صادگتك ، !!
البنية تضحك على هيجي نادي وميانه !!
وبالاخير راحت فلوس درة فاروق !! ورجعنا للكلية بالمطر على صوت امل حياتي وانت عمري !!
ومثل شليمون ونظريته ،، طبقت واستفادت من تجربته اميركا ،، حيث طلعتنه مالص ولعبت فرس ، كونيللا وياها !!!
وعمت ايينك بوش ،، وعمت اييونكم اوباما وميتشيل اللي صادكتك ،، !!
وعمت أييني الف مرة واللي صدگت بكلاوات السياسة ولعبة الامم ،، والديمقراطية الجقلاء !!!
محد يفتهم غير شليمون الله يرحمه !!!
تحياتي للجميع متمنيا لكم كل السلامة والخير