مكتشفات عراقية في طريقها للزوال !!!

التفاصيل

تم إنشاءه بتاريخ الثلاثاء, 13 تشرين1/أكتوير 2020 16:16

كتب بواسطة: سيف الدين الألوسي

                        سيف الدين الألوسي

مكتشفات عراقية في طريقها للزوال !!!

1- تغطية التلفزيون بجرجف كلبدون حتى لا ينشل ويستبرد .
2- عمل الطهارة او بيت الادب او الخلاء جوه الدرج ،، وبمساحة ٩٠ سم مربع ،، ماخذ منه ٣٠ سم مربع البريك والمزمبلة والسيفون مزنجر ويخرخر !! ،، واذا طلعت بطنك ونسيت انت وين كاعد ،، وتوگف رأسا ،، ينرگع راسك بالسگف !!!
3- وجود المغسلة بصف باب الطهارة ،، وبيها جرجف بلاستك مشجر داير حبل !!
4- الاوجاغ متغير لونه من الابيض الى البرونزي من طفار الدهن من الطاوه !!!
5- مزهرية بنص ميز الاكل بيها ورد جوري اصطناعي وامام الميز لوحة ستل لايف مال شيف ركي وعنكود عنب وخوخاية وتفاحة ،، چانت قبغ مال قوطية نستلة مال بسكولاته !!! أطارها بكد سعرها عشرين مرة !!
6- فرو احمر على دشبول السيارة وخصوصا الموسكوڤيج الكاروكي !!!
7- كلاص خاص لرب العائلة ريحته يانسون ومحدد من جوه !!!
8- صورة لرب العائلة وزوجته مال زواجهم معلگه بنص الهول ،، يگابلها الرجال ويبچي من يتذكر ايام عرسه ومن تصعد عنده!!!
9- بطل اسفنيك جوه الدرج ،، وبايسكلات ام تلاث چروخ وقعادة منگوبة ، وقنادر وبوابيج عتك !!!
10- قواطي مال حليب كيكوز بالثلاجة مليانه مي ،، وريحتها بيض لان الجهال شربوا بيها مي گبل ميغسلون حلگهم !!! ووحدة بالفريزر حتى تجمد خاصه لرب الاسرة وللاستعمال الليلي !!
11- مبردة بليه طوافة والمي يخرخر للشارع !!
12- صورة بنص البيت ولمن يحكم البلد تتبدل تلقائيا ويه تغيير النظام والشخص !!!
13- غسالة تويست اغين ،فوكاها چرچف ومزهرية وطاولي !!!
14- طمغة مال نعال ابو الاصبع على حايط الهول !!
15- ابو بريص بالسگف يم الرازونة ،، ديتفرج من فوگ على متحف اللوڤر !!
تحياتي للجميع وحتى شوية نغير متلازمة الكآبة المجتمعية الطاغية اليوم .