شلون بلوة !!!! عالم مهزلة !!! چذب ممصفط بزمن الانتخابات الكلاو !!!!

التفاصيل

تم إنشاءه بتاريخ الأحد, 01 تشرين2/نوفمبر 2020 13:19

كتب بواسطة: سيف الدين الألوسي

                          سيف الدين الألوسي

شلون بلوة !!!! عالم مهزلة !!!!چذب ممصفط بزمن الانتخابات الكلاو!!!!

قبل يومين اشتريت مليونين طن نفط ،، نصها من تكساس للاستهلاك المحلي ونصها من العراق والسعودية ،، دفعت كاش ،، وحسبولي نفط تكساس استلام اوكلاهوما وره ساعتين ب ٢٢ دولار و١٥ سنت ،، نفط حلو وخفيف ،، واستلمتها ودزيتها للمصافي مالتي بالالبرتا بكندا وبتكساس وبنورث داكوتا ،،، والنص اللاخ ده انتظر تحميلها بناقلاتي العملاقة الستة ام ٢٠٠ الف طن لشحنها لليابان وفرموزا وكوريا الجنوبية واستراليا ونيوزيلندة وبحصص ٤٠٠ الف تن لليابان و٢٠٠ لكوريا الجنوبية و ٥٠ الف لفرموزا ،، و٢٥٠ لاستراليا و١٠٠ لنيوزيلندا ،، وحصة نيوزيلاندا بيها شركاء معي ياسين الخضيري ود قصي السامرائي ونمير عمسو اصدقاء الطفولة المتهجولين !!! ،،،، المهم وره ما خرط السوك البارحة ،، خسرت الاكو والماكو وحتى كابتن الناقلة العملاقة ام ٢٠٠ الف طن المسماة ( حورية ابو نواس الچقلة ٢ ) ،، سوه اضراب ورح اطرده هل الكلب ابن الكلب !! 

ثبت لي بعد تجاربي مع اسواق النفط والنيكل والبن والهيل والذهب والفضة والسيزيوم والقمردين والسبرتو دملوغ ،، بأن سوق البورصات هو ريسز ،، والريسز يتحكم به المالكين للخيل والجوكية والمدربين ،، وسوك البورصات يتحكم به الحرامية وال.... وكلاوچية المضاربات من خريجي كليات الجامعات المرموقة والفقهاء بالعلم والدجل والنصب والاحتيال والتي تخرج طلاب محترفين للاثراء براس ال.... الصدگ !!!!! ،، وشفط فلوس الزواج والقشامر ومحبي اللحم الريان اهل الفلوس ،، او الاحزاب والساسة واللي جابوهم هم وانطوهم مجال وفلوس حتى يلعبون بيها ثم رح يطلعوها فتل فتل من خشومهم !!! ورح يرجعوهم يتمنون طماطية محموسة وكرصه خبز وراس بصل اخضر !!!!
كورونا لعبت شاطي باطي بالعالم ،، وسمعت خبر عاجل بأن بعض الدول تجرب لقاحاتها بدول غير دولها وبراس ولد الخايبة !!
خسارتي لا تعوض وفوكاها باخرة الگهوة الجاية من البرازيل ضربت جزيرة مرجانية وانكبت صفحتها وتم قطرها ولكن بعد تلف الگهوة واصبحت كهوة مملحة بماء البحر !!!!
وره هذا التعب والخسارة الكبرى ،، قررت استثمار فلوسي بصناعات ثقيلة وتعاقدت على عدة معامل في اراضي املكها بالارجنتين ونيكاراغوا وكندا وولايات ايداهو ونبراسكا وتينيسي والبو كركي بنيو مكسيكو وريف دمشق ، على انتاج صبغ القنادر ومربى النبك والزعرور ، والزردة بانواعها الصفرة والبيضة والجوزي ،، وخبز العروك ،، والسمسمية والساهون ،، والفرارات ام الچقه ،،، وناشد اخوان وصابون ركي من زيتون الغوطة !!!!
خو ما صدگتوا !!! تره كلشي يتعوض بس الصحة وراحة البال والقناعة متتعوض مع تحياتي للجميع .