ناس وناس !!!

التفاصيل

تم إنشاءه بتاريخ الأحد, 20 كانون1/ديسمبر 2020 10:54

كتب بواسطة: سيف الدين الألوسي

                         سيف الدين الألوسي

ناس وناس !!!

اكو مثل بغدادي عتيك يگول
الزنگين يگلوله مبارك ،،، والفقير يگلوله منيللك؟!!
مثلا اذا زنگين لابس تي شرت مال لنگات ،، كل اللوگية والمنتفعين داير حبل يگلوله ،، يخبل هذا التي شرت ،، يجنن وحتى لو مجرب ومجولك ،، لايگلك هواية ،، لونه يخبل ،، احسن ماركة ،، بيش ماخذه ؟؟ الله يدري ببيش !!! اكيد من روما مشتريه لو من لوزان !! طالع عبالك ممثل ،، تشبه توم هاردي لو ليناردو دي كابريو !!
اما الفقير لو مدشن تي شرت گوچي لو فارغامو لو ديور ،،،، الناس تگله:

هذا منيلك ،، منو منطي الك ،،، شحاله ،، چبير عليك ،،، ياخته محلوه ،،، يسوي صنان ،، تقليد مو اصلي ،،، صيني چذابي ،،، شكو عليك امورك زينة ، صاير تلبس هدوم مال اوادم !!!! طالع تشبه دخو بهذا التي شرت ،،، هو لابسك مو انت لابسه ،، ملايگلك ،، طالع چنك ديج مهلوس !!!!
وخطية من ضيمه يروح يملخه للتي شرت ويگول من .... بحظي !!!
نفس الشي بالنسبة للقاح كوفيد ١٩ ،،، دول سبحانه تعالى نافخ بصورتها وبدت بالتلقيحات لناسها وشعوبها ومنها دول عربية ،،، ودول متدري شكو ماكو وشتسوي ،، ويمكن ليهسه مسامعه بكوفيد ١٩ !!
ودول رح تلقح اهلها بلقاح تيفو محل كوفيد ١٩ ،،، ويمكن رح تنطي اللقاح الثلاثي للاطفال ابو القطرات الوردي بالغلط لشعوبها !!!
اما وچ البومة الاثيوبي فملتهي يحذر ويخوف البشر ،، ويلگم منا ومنا كأنه دلال مال طيور بسوگ الغزل !!!
وصدك لو گالوا ،، ناس تاكل دجاج ،، وناس تتلگه العجاج وتاكل فشقي بالبانيه !!! وتنتظر اقرب الاجلين !!
ومن الله يطيح حظ هذا الزمن ،، زمن النفاق والكذب والرياء .
وميري كريسمس وهابي نيو يير للجميع وخصوصا اخواتنا واخوتنا الاحبة المسيحيين العراقيين اين ما كانوا، مع كل الود والمحبة لكل البشر الطيبين في كل العالم دون استثناء .