في يوم ، في شهر ، في سنة !! في طيحان حظ !!

التفاصيل

تم إنشاءه بتاريخ السبت, 10 نيسان/أبريل 2021 06:19

كتب بواسطة: سيف الدين الألوسي

                          سيف الدين الألوسي

في يوم ، في شهر ، في سنة !! في طيحان حظ !!

المرحوم العندليب الاسمر، حلومي كان مرهف الحس ، گلبه رهيف ،، يخرب ويتكهرب على الحب ، والحب هي مشكلته الوحيدة في حياته ،،، واقصد حب الاوخ !!!! ،،،. وليس حب الاولاد او العائلة او الوطن او التكه والفشافيش !!
في هذه الاغنية چان كاتل نفسه على مريم فخر الدين ، وحبهم وشلون صارت حكاية حبهم ،، وگعد بليلة مقمرة على البحر يون وهو لابس بالطو يخاف لينشل مو حتى ينعدي ويصير بي كورونا !!!! ،،،

ومريم قبل متموت طلعت بلقاء تلفزيوني وهي غادية بركونده ،،، وگالت چانت ريحة حلگ حلومي مو طيبة وخصوصا من ابوسه بالفيلم وبسبب مرضه الف رحمة عليه !!! ،، خلفله عليچ ،، يمكن اخرفت تالي ايامها !!!! وعلى اساس هيه ريحة حلگها مسچ و قداح !!!
وعبد الحليم الله يرحمه في كل فيلم ، كان يحب وحدة ويبذل كل جهوده ،،وتنزل دموعه من اجل هذا الحب ،،ومبتلي بي لو عبد السلام النابلسي الله يرحمه لو عبد المنعم ابراهيم رحمه الله !!! ،، مرة يحضن المخدة من ينام !! وعلى اساس المخدة لبنى عبد العزيز ،، وهمزين مصار شي بالمخدة لو ماخذه الواهس ورايح زايد !!!! ومرة يتلف روحه على زبيدة ثروت!! ومن تجي من الخارج !!! ،، ومرة ويه صباح رحمها تعالى من چانت ٨ سلندر والكل طلعوا تراي بزواجهم منها ،، و من نصبت عليه خطية وهمين تلف روحه ، وبعدين تندمت وحبته من كل گلبها !!!
بزماننا چانوا البنات يخربون على عبد الحليم ومن كل عقلهم !!! ويمكن اخر فيلم له كان ابي فوق الشجرة والذي عرض بسينما النصر سنة ١٩٦٩ ،، وانترست السينما بالجنس اللطيف ،، نثايا ومسنات !!!! وهمين طلع يخرب على ميرڤت امين من مثلت في اول ستادها كولت اهل الريسز !! وشوية صار لوتي ومنغل ويه نادية لطفي ،،،. شكو مراهق راح لهذا الفيلم بضمنهم صاحب هذه الكلمات !!!!!!
ابو وحيد الف رحمة على روحه، فريد الاطرش يعاني من نفس المشكلة وهي متلازمة الحب الغير مشخصة سريريا !!! بقه يون ويونون ،، مرة على هند رستم ومرة على مريم فخرالدين ومرة على سامية جمال ومرة على جمالات الشغالة فاتن حمامة !! ومرة همينه على الشحرورة والتي كانت مرغوبة بذلك الوكت مثل السوبر ٨٥ !!!!!!!
وره كل هذي الجنجلوتية وذكر حلومي وابو وحيد بالخير ،،اريد اسألهم سؤال !!! لويش جانوا مبومين دائما !!؟؟؟؟؟
امر من حظنا !!!!!
اشو !! ،، لا انتوا فديوم ساقوكم لتجنيد ،، ولا خدمتوا عسكرية ولا حتى بالمسرح العسكري !!! ولا شفتوا حصار ، ولا حروب ولا طائفية ولا ولا ولا !!!! ، ولا لزمتوا سره على النفط والصمون ،، ولا تهجولتوا اجباريا وتبهذلتوا وضيعتوا الچوخ والبداوي ،،، !! ،، ولا شاركتوا بعملية ديمقراطية نموذجية فيدرالية ، والله تعالى سلط عليكم نماذج جديدة تتميز بالصدق والبناء وعدم السرقة وعدم النفاق والضمير الحي الغير قابل للمناقشة ،،،، ولم يسألكم رشدي اباظة انتوا من يا عمام ،، ولم تسألكم سعاد حسني انتوا من اي مذهب او دين ،،، ولم يستفسر عنكم محمود المليجي من اي قومية انتم !!! ،، ولا شفتوا كورونا والكمامة الصينية اللي تعبر ڤايروسات ( الصين ملكة النصب والغش بالكون للاسف وتلك حقيقة ) ،، ولا تمتعتم بصورة كمالا هاريس من تحچي من وره الكمامة !!! وبقيتوا تونون وخليتونه نون وياكم ورح نبقى نون وحايرين بزامنه الى يوم يبعثون !!!! والى اقرب الاجلين !!!
وفي يوم وفي شهر وفي سنة ،، !!!!!!
وفي اسكالوب وفي پيپر ستيك وفي ملوخية على فراخ ،،، وفي دگاگ على ارانب !!! وفي تكه وفي مشوي مشكل ، عدكم زلاطة وبيرة ؟؟؟ ،، ايوه في سلطة وشيبس وفريدة ،، والسطرين الاخيرة مقتبسة من كولت الاخوة البويات المصريين بالثمانينات والسبعينيات !!! عدكم حمص ، فتوش ؟؟؟ مفيش لا حمص ولا فتوش !!
ورح نبقى انون ومثل اكسل الفولغا ،، الى ان نترحل للمحافظات وباقرب وقت بهذا الزمن الغير معقول واللي يثول حتى اينشتاين !!!
حتى الامير فيليب مات البارحة من قهره بهذا الزمن وهو لا يزال في عز الشباب !!!!!!! وترك ارملة صغيرة شابة كلشي مشايفة بالدنيا خطية !!!!!!!!!!!!!!
تحياتي للجميع وكل السلامة