مطعم الجنابي في الكمب !!! ملتقى العشاق ومحبي الكباب والبتيته جاب !!!

التفاصيل

تم إنشاءه بتاريخ الجمعة, 02 تموز/يوليو 2021 06:46

كتب بواسطة: سيف الدين الألوسي

                           سيف الدين الألوسي

مطعم الجنابي في الكمب !!! ملتقى العشاق ومحبي الكباب والبتيته جاب !!!

بغداديات قبل زمن التيفو والايدز والكورونا !!!

مطعم كباب الجنابي في راغبة خاتون ، وعلى شارع الكمب ،، هو من اكثر المطاعم التي كان يرغب بتناول الطعام فيها طلاب الكليات وطالباتها !!! وخصوصا في الفترات ما بين العاشرة صباحا والواحدة ظهرا !!!! وكان لقرب المطعم من معظم الكليات وكذلك طعامه اللذيذ والنظيف والرخيص نوعا ما ، هو من الاسباب الرئيسية لذلك !!!
في منتصف سنوات السبيعينيات وفي تلك الفترات من النهار ،، كان الشارع يزدحم بسيارات الطالبات والطلاب ،، وحتى الازدحام داخل المطعم يوصل لابو موزة ،، والبعض ينتظر خارجا لحين ان تفرغ طاولة ،،، وما عدا السفري ولمن ينتظر في السيارة ، او ليأخذ الطالب اللفات الى الكلية بعد ان وصته عليها المدلولة المطعوجه !!! وهو الممنون !!
كان المطعم يقدم الكباب والبتيته جام والمخلمة والباسطرمة والجللي فراي وليس الجللي بم !!!!!!
المهم في احد الايام وكنا مجموعة من الطلاب ذاهبين لنأكل في الاستراحة بين المختبرات ،،،، ولدينا اثنين من الاصدقاء مبردغين وخالين ريحة من الزينة ومسوين شعرهم تواليت !!! وجايين بسيارة احدهم الرينو الصفراء١٧ تي اس الكشخة بهذاك الوگت !!!! ( احد اصدقاؤنا جان حاروگة ضربهم بعين اصلية !! ) ،ورأوا مجموعة من بنات الادارة والاقتصاد القريبة من المطعم ، وهن نخبة من جميلات هذه الكلية التي كانت زاخرة بالجمال والغنج !!!! اكيد هسه غاديات بركونده كلهم !!
بقوا هؤلاء الاثنين يحوصون !!! ساعة يدخلون للمطعم المقبط وساعة يوكفون بالباب ، ينتظرون البنات يطلعون ، والبنات جايين مشي من الكلية لانها قريبة !!
احنه جنه كاعدين بميز خارجي والدخاخين مال الكباب والتكلاه عثولتنه !!!! بس دننتظر النتيجة !!
المهم طلع سرب البنات المتكون من عشرة او اكثر ،، وربعنه الاثنين ،، وراهم وعافوا الاكل ،،، ونگروا سلف واول لوفة ، لافوا وهم ينظرون ويبتسمون للبنات ، وووووووو وعيونهم على البنات مو على الطريق ،، واذا الاخ يفوت بمنهول كبير للمجاري مفتوح ! وراسهم طخ بسگف السيارة التي انگطمت طبلات الصدر والرواط مالتها وبعد ان خرجت من المنهول تك وتك !!
طبعا فوگ القهر البنات يضحكون وكأن شيئا لم يكن !!!! ورجعوا للكلية !!
والاخوان نزلوا من السيارة يكفرون ،، واحنه ذهبنا لمساعدتهم !!!!!
وطار البوز وطارت الريحة وطار صدر الرينو !! وحلف يمين اخونه بعد ميجي للكمب لو يكتبوها بأسمه !!!
تكلمت معه قبل ايام في اميركا وسألته عن مصير التي اس !! ،، وكال بعتها للسيارة وره ما صلحتها واشتريت لادا لان يادوب فلوسها جابت لادا !!!
وگام يسب بشيراك .