حچاية التنگال ١١٥٦

التفاصيل

تم إنشاءه بتاريخ الأحد, 25 تموز/يوليو 2021 21:35

كتب بواسطة: د.سعد العبيدي

                                د.سعد العبيدي

حچاية التنگال ١١٥٦

عضو برلمان هي الي گالت، جريئة، تعادل سبع أعضاء برلمان وسبع زلم من زلم هذا الوكت إذا اجتي براسها ورادت تگول، والكل يعرفها ما عدها لحية مسرحة من تريد تگول واعتقد من هذا اليوم الى يوم الانتخابات (هاي اذا صارت انتخابات) راح نسمع منها ومن غيرها برلمانيين وسياسيين هواي گول.

- المهم هي اشگالت؟:
- گالت وهي واثقة من نفسها:
- ميزانية الوقف الشيعي والسني تعادل ميزانية عشر وزارات. وأضافت:
- شنو الفايدة الي يقدمها الوقفين للمواطن. وكررت الگول:
- ترميم جامع بخمس مليارات، وكنس وخدمات جامع بمليارين.
ترة صدگ شني فايدة الوقفين السنيين الشيعيين العظيمين الصامدين لمواطن يعيش بجهنم من وره الكهرباء، وهي أزمة ما تنحل الا بالنزاهة والفلوس؟. وشنو ذنب المواطن المسكين الي ما لاكي شغل، بعد أن تعطلت مشاريع الاستثمار من وره الخباثة ونقص الفلوس؟. وليش الطفل عدنا ينشأ ناقص تعليم ورفاه وحاجات رئيسية للنمو السليم من وره قلة المدارس وقدمها وسوء ادارتها والتعليم ينرادله فلوس؟. ليش ترممون الجامع وتعوفون المدرسة، وليش تكنسون الجامع وتهملون المستشفى، وليش تنطون للوقفين وما تنطون للصحة والزراعة والصناعة؟.
خلوها ببالكم: تره لا الله يرضه بهاي القسمة، ولا عبد الله من وراها راح يعبد الله زين!!!.