رجـليـه بـ اچـلانـَه

التفاصيل

تم إنشاءه بتاريخ السبت, 04 أيلول/سبتمبر 2021 16:53

كتب بواسطة: ميسون نعيم الرومي

ميسون نعيم الرومي

رجـليـه بـ اچـلانـَه

صرنه فرايق طرق والدنيه لعبت بينه
كلمن صفاله ابكتر وامگطعه مراسينه
***
گطعوا مراسينه گبل والناس مرعوبه
تـتـرجـّه الفرج بعـيـون متـعـوبـَـه
***
شـو جانـَه فـَـرج متحزم احـزاميـن
بيده محابس شذر والعـِـمـَّـه مدري امنين
***
افرحنه او رگصنه ابجيته هلهلنه غنينه
غـِـنـوات النصر والفـرح طب ليـنـَه
***
فرج يافرج ع الكرسي لزگ وامهلس الحانه
راسـه بالسمه او رجـليـه بـ اچـلانـَه
***
بچلانه يرغ ، والذهب بجـيـوبـَه
يكرف كرف ، والخزنه منهوبـَه
***
عقدين امن الزمن ما شبع لا يروه
ينخـل بالوطن ، اوبالخارج الثـروه
***
كثروا ايتامك يا وطن نسوان متعزيه
انقاض وازباله صرت ، جيرانك امعيده
***
امعيده واتـْظـِلمَـك ظلم، ماي اوكهربه كطعته
ترياگ اوحشيشه واسموم اوقهر، بالعمده ودته
***
بـَـعـْـد اوبـَـعـَـد يا وطن خو تدري!
ابكل شبرالفساد ! اوعالبال ما يطري
***
ولدك خو گبل ، بالحرب كتلوهم
آلاف امألفه ، عدموهم اوحرگوهم
***
واليوم النهج ، شو چنه خو ينعاد!
تجنيد اشتغل ، وايضحي بالأحفاد
***
احفادك يا وطن !! بيهم اويهدون
للجار اوأجنبي وابدمهم اويحمون
***
چا يمته من فرج ! نخلص اوهم نرتاح ؟
من فرج الفرج .. والفرج ما ينلاح
--------------------
4 / أيلول / 2021
ســـتوكهولم