روح انتخب!!!

ميسون نعيم الرومي


روح انتخب!!!

لعبـَـوْ لعب زوج اوفرد – راح الوطن ثرْدوا ثـَـرد
دَمـْـنـَه انشفط حد الجلد – حتى العظم جردوا جـَرِد
ما تتعظ ؟ يمته اوتصد – روح انتخب واوي اوقرد
روح انتخب !
روح انتخب هافي البخت – گـَضـَّه العمرعايش سحت
اسنين الگضت مـِنـَّـهه اشفت؟ -غير النفخ غير الهـَـفت
طعـْـم الفگـرما ينسي ؟ – ذلـَّه اومهانه اتعلمت ؟
روح انتخب !
روح انتخب من جوَّعـَـك – تلطع دمع چن علـَّمك !!
يلغف لغف ماينوصف – وابـْعـِرفـَه باعك فرهدك
ولده .. بـناتـَه امنعـِـمـَه – عـوز الولد ما دمـَّـرك ؟
روح انتخب !
روح انتخب أسمـَـن (كبش) – امدلل اوكاشخ ع الغنم
والأحسن الماعـِـنـْـده عـِـلـِم – ما يعرف ايخط الأسم
يـوميه نـادم فـَـد نـَـدم – مدگلي يمتـَه تـِـفـْـتـِهـم ؟؟
روح انتخب !
لو تـنـتخـب ام اللبن – امثـَخـّـنـَه الحواجب والجفن
بـنعال او بطل يتمالخن – (سعلوه) عـوبـَه يا زمن
بوگ اورِشـَه ، ابطول اللسن – بيهن قدرنه ممتحن
روح انتخب !
هم تنتخب واتعض الاصبع والقدم؟ - لو بابك اتسدَّه اوتلتزم؟
والروحك اوبيتك تحترم – اوعالي تـِرُفـْـعـَه للعلم
لا عـذر عـنـدك لا أمل – واتعـيـش عـمرك بالندم
لا حچي ينفع لا عتب – واتگضـّي العمربس تنتحب
لو ردت .. روح انتخب !
روح انتخب .....
--------------------------
 اكتوبر/ 2021
ســتوكهولم 

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

855 زائر، ولايوجد أعضاء داخل الموقع