حلم بالظهرية و درجة الحرارة -٤ بنص الثلج !!!

التفاصيل

تم إنشاءه بتاريخ الأحد, 28 تشرين2/نوفمبر 2021 17:32

كتب بواسطة: سيف الدين الألوسي

                       سيف الدين الألوسي

حلم بالظهرية ودرجة الحرارة -٤ بنص الثلج !!!

البارحة كان هنالك سقوط ثلج ودرجة الحرارة دون الصفر مئوي ،، ميتشيغان بالشته عبارة عن فريزر بطحي فيليبس ابو مترين مال الاول !! جو بارد وقارص وخصوصا للشياب ،، ميبقي مفصل ميجيم بالاضافة الى امراض الشتاء كالانفلونزا والتهاب القصبات والنشلة والحساسية ، و من التدفئة الجافة المعززة بجهاز رش رذاذ الماء حفاظا على رطوبة البيوت !! المسنات والمسنين يدخلون في سبات شتوي حالهم حال الديناصورات وامهات واباء بريص من الزواحف ،، وكلمن يختل بزاغور وهو يغفي ليل نهار !!

وره كل هذي الجنجلوتية ،، البارحة تغديت دولمة وذهبت لنوم القيلولة ، والتي هي مهمة لي صيفا وشتاءا ،،، الحچي ساعة ثنتين پي أم ،،اي بعد الظهر !! شفت حلم عجيب غريب !!! حفلة بالاخرة وقصر ويخوت على البسفور باسطنبول ،،، ام كلثوم وعبد الوهاب وزكي موران وصباح وفرانك سيناترا ووديع الصافي واكفين على المسناية ديسولفون ،،،
صباح دتفشر على فادي وشلون باك فلوسها هذا الخورونك !!!! ووديع الصافي يگلله ،، صوچج ،ام د ،،، !!!!
من بعيد شفت عدد من الملوك العرب ومنهم الملك فاروق وملوك العراق وملوك اخرين لم افرزنهم ، وعدد كبير من الساسة واقفين بالحديقة ومنهم تشرتشل وكليمنصو وبوش وديغول وواكف ابو صباح نوري باشا السعيد يعاتبهم على دكايكهم ، وكل دقيقة يخلي ايده على اذنه على اساس مديسمع زين من الهوسة !!! وبعدين رزل بوش فد رزالة زينة ، وگاله ، لك اغبى منكم مشايف !!!! هايه الردتوها ،،، لا حضيتوا برجيلها ولا حضيتوا بسيد علي ،،، صرتوا مضحكه لليسوه والميسوه !!!
اللي جذب انتباهي هتلر واكف بار مان والبويات هواية روؤساء سابقين اجانب وعرب !!
اكو ميز مدور مال بوكر ،،، ميز روعة قبغ مرمر كراره ،، بس فارشين فوگاه بطانية مال فتاح باشا مال الاول ،، وكاعدين شون كونري وفريد الاطرش وعبد السلام النابلسي وجون وين وكميل شمعون وعمر الشريف وكوكو شانيل وجوزفين مرت نابليون ديلعبون بوكر ،، ما ادري منو زاغل ، يمكن كميل ؟! رزله شون وگاله لتزاغل مثل الانتخابات بدولكم ،، وين گاعدين حبيب البي ، قابل كاعدين بدير القمر بالشوف !!!
ركزت بالحلم والحفلة ،، لگيت غاندي مبردغ ديتمشى ويه رومي شنايدر وفي جو حميمي كله حبيات !!!
وراها اجاني حسن فايق يركض ،، گاللي وينك ابو عبد الله ،، بديعة مصابني بتسأل عليك هي وكاميليا ،،، زمنكم اللي عايشين بي انكس زمن ،،، بيضيق النفس ويخبل الميتخبل !!! تعال معانا بتنبسط اوي اوي !!!
فزيت من نومي عرگان بهل البرد ،،، وطلعت الدولمة زقنبوت .
كل الرحمة على من ذكرت اسمه وعلى جميع البشر .