من غير زعل - وليدي شبقى بالعراق حنى تبقى كرة القدم؟؟

                                                  

                            جلال چرمگا

   

من غير زعل - وليدي شبقى بالعراق حتى تبقى كرة القدم؟؟

كأنه محسودين و مانگدر نطلع منها ، اشو بكلشي وكلاشي صرنا صفر ومايصيرنه چاره اطلاقاُ و ما نعرف وين ننطي وجوهنا؟؟!.

البارحة بالليل اتصل بي ابني الصغير (اسعد ) وهو مقهور!!.
گتلة شبيك بابا؟؟؟
گال :بابا معقولة قطر تغلب منتخبنا ثلاثة صفر؟؟.
گتلة :شنو الما معقول.؟؟
گال :اني سامع وقاري بأن المنتخب العراقي أيام زمان كان يأخذ كأس آسيا و كأس العرب وهواية مسابقات، لعد اليوم شجانا؟؟.
ضحكت بمرارة وجاوبته:
وليدي هو شبقى بالعراق صحيح؟؟.
- جواز السفر اللي بأسفل كل البلدان؟؟.
- هيبتنا ؟؟اشو صايرين حايط أنصيص ياهو اليجي ويكفخ بينا ، ايران تدخل اراضينا وتقصف وتحرق الغابات!!.
- تركيا هذه الطمة الكبرى ، يوميا قصف قرى وبناء قواعد و طرد القرويين من اراضيهم ومساكنهم ولا رادع إلا بيانات خجولة من جوة العباية و لا حركة!!.
- دينارنا مقابل الدولار؟؟.
- الدجلة والفرات وبقية ألأنهر اللي كلها راح اتجف و ولا حركة من قبل الجماعة!!
- الحصة التموينية اللي بالكاد يقطرون على اهالينا وكأنما يتصدقون عليهم!!؟.
- تدخلات الجمهورية اللا اسلامية بشؤننا الداخلية وهاك عدد كبير من الميليشيات بأسلحتهم الثقيلة وسياراتهم الحديثة و فضائياتهم واذاعاتهم و كل مليشيا حكومة بحالها وصلت بيهم الحالة يهددون الحكومة و رئيس الوزراء خو اذا وزير من الوزراء صرح وكان يمس ملالي ايران؟؟ هاي الله كتبها عليه لو لازم يعتذر ويستقيل لو يطگوا بالدهن و الله وياك عبوسي!!.

               

 - مدارسنا ، صدگني ياوليدي الى آلآن اكو مدارس بلا رحلات ولا سگف ،الطلاب فارشين الأرض وكأنهم في بدايات القرن التاسع عشر .

- حالة شوارعنا الداخلية والخارجية اللي ما تتصور شلونها من حفر و نفس الشي بالنسبة للجسور.
- الجنرال قااني اللي اجا وره سليماني اشو خري مري جاي للعراق و يجتمع بالميليشيات داخل السفارة الايرانية ويتدخل بكل صغيرة وچبيرة ولا واحد يگدر يفك حلگه ويگوله:
آغا فدوة العينك انت شكو عندك يوميا رجل ابغداد وألأخر بطهران ياترى انت تدخل بتأشيرة للعراق لو خان چغان؟؟.
بعد عليش مقهور ومتعصب يا وليدي ، يعني تريد منتخبنا يكون خارج المخطط اللي رسموها لوطننا؟؟.
لا حبيبي صدگني لو نعلب ويه جنوب السودان هم يغلبونة اربعة صفر!!.
نام وليدي ولا تقهر نفسك ترة گلوبنا خلصانة وملينة من التفكير ، من غير زعل ، سجل عندك وانا المسؤول عن كلامي:
اليوم احسن من باچر وبكل النواحي و عندك الحساب و مع السلامة!.

   

  

إذاعة وتلفزيون‏



الأبراج وتفسير الأحلام

المتواجدون حاليا

960 زائر، ولايوجد أعضاء داخل الموقع