حچاية تنگال ٢٣٣٧

                                                      

                            د.سعد العبيدي

حچاية تنگال ٢٣٣٧

اشلون ردت أهضم مقولة الحكومة إحنه أهم دول المنطقة بالنمو الاقتصادي، واحنه نجحنه بتحقيق أعلى نمو اقتصادي خلال عامين، وإحنه وإحنه: ما گدرت، ولمن سألت طلع معظم العقال واهل الاقتصاد والصناعة والزراعة والعلم والمال، وفتاحين الفال هم ما گدروا، اشلون ترهم: ومعمل من المعامل المسدودة ما فتحتوا، ولا شلتوا التراب من عليها، ولا فعلتوا، حتى نگول أي والله صدگ بدينه ننتج بسامير وابر، وشخاط وگيوات، ونعل تسد حاجة السوگ وتزيد الدخل، ولا حليتوا مشكلة المنافذ الحدودية، وضبطوا الگمارگ والضريبة ولا سيطرتوا، حتى نعترف بزيادة واردات الدولة والي هي مؤشر من مؤشرات النمو، ولا غيرتوا من نهج الزراعة حسب شحة المي، وبديتوا تصدرون فجل وكراث لدول الجوار حتى تعترفلكم ذيچ الدول انكم عدلتوا ميزان التبادل التجاري بينهم وبينكم مؤشر آخر للنمو. بالله خلونا من هاي السوالف الي ملينه من تكرارها، والي يبين حلها اعلى من القدرات المتاحة لحكوماتكم، حلوا بس مشكلة الازدحام بالشوارع ونظموا السير، والطرق والناس راح تبقى تترحم عليكم، وتعترف الكم قادة النمو وابطاله الى يوم الدين.

بشرفكم أكو واحد غشيم ابن غشيم ما يعرف الفروقات بأسعار النفط الي وصلت ثلث أضعاف هي وره الوفرة المالية الي تحسبوها نمو: النمو هو جيب زلم اشلون تحول الوفرة الى طاقة إنتاجية وتشغيلية وتجارية، وتنعش سوق العمل، وتقلل نسب البطالة والفقر، وتحسن سعر الصرف. المشكلة كل حكامنا بهاي السنين دينيين، وكلهم يعرفون الچذاب الله يذبه بالنار، لكنهم ......

إذاعة وتلفزيون‏



الطرب الأصيل

الأبراج وتفسير الأحلام

المتواجدون حاليا

901 زائر، ولايوجد أعضاء داخل الموقع