مجرة ابن طوبان!!

التفاصيل

تم إنشاءه بتاريخ الأربعاء, 13 تموز/يوليو 2022 09:39

كتب بواسطة: سيف الدين الألوسي

                         سيف الدين الألوسي

مجرة ابن طوبان!!

ناس دتفكر بمجرات ونجوم تبعد ملايين السنين الضوئية ،، ومجرات وصل ضوئها لنا بعد اربعة ملايين سنة ضوئية ،، وتلسكوب ابو النعلچة يصور ويدز !!!

والدنيا مثبورة ثبر بهذا الاكتشاف العظيم فوق العادة ،وصور المجرات ركع بفلس تتناقل في الفيسبوك ،، حتى ستار البايسكلچي صار عنده اهتمام بالفلك والنجوم ،، ونقاشات حادة حول المجرات ،، وبعدها عن مجرتنا ام الدروب ( درب التبانة ) ، وكوكب في مجرتنا يبعد سبعة الاف سنة ضوئية محتمل فيه حياة ،يعني يبعد مسافات يقطعها الضوء في سبعة الاف سنة ،اذا علمنا ان الضوء يقطع ١٨ مليون كم بالدقيقة الواحدة لعد شكد المسافة بسبعة الاف سنة ، وسبعة الاف سنة چم دقيقة !!!!
بالنسبة للمجرات والنجوم وعدد لا نهائي منها في الفضاء شئ نعرفه من زمان وقبل صور ناسا ،،، ناسا طكت صور جديدة حلوة وواضحة حتى تفتهم الفضاء اكثر !!!
هسه اني لويش حاير ؟؟؟ لا رح اعيش نونو مو نانو سنة ضوئية ،،، واحنه كهرباء عادي صارلنه ١٨ سنة عادية ممدبريها ومنتظرين جارتنا الحنينة تنطينه غاز بفلوسنه !!
وناس متلكية العجاج بسبب التغيرات البيئية وصحة الامطار والمياه ، وناس حايرة بكورونا والحمى النزفية والكوليرا وابو خريان !!!
وناس كاعده تهفي ، وناس متهجولة بالقارات تون ليل نهار على الماضي وايام صباح وهند رستم ومريم فخرالدين ورشدي اباظة مثل فريد الاطرش او ابو وحيد الحالي الذي هو كاتب هذه السطور !!!
وناس فرحانة لان ابن الزهاوي رح يصير رئيس وزراء بريطانيا !!
صدك هذه الحياة سينما ببلاش ،، واللي ما عنده شغل يروح يشرب شربت جبار أبو الشربت !!!
بس المشكلة كهرباء ماكو و محل جبار بذاك الصوب !!!
تحياتي للجميع