حكاية غرامي حكاية طويلة !! مع البزازين - فانتازيا!!!!

التفاصيل

تم إنشاءه بتاريخ الجمعة, 07 تشرين1/أكتوير 2022 19:58

كتب بواسطة: سيف الدين الألوسي

                         سيف الدين الألوسي

حكاية غرامي حكاية طويلة !! مع البزازين - فانتازيا !!!!

في بغداد هنالك حكاية غرام تراجيدية مع البزونة اللعوب طروب !! ملكة التلگلگ والنفاق !!! اتى مؤخرا الجيرمن شيبرد الاصيل قيصر وقلص كل صلاحياتها وتقلصت ايضا ميزانيتها حسب قانون الغذاء مقابل الميو !! ولاستهتارها وغنجها الاكثر من اللازم !!

في العام الماضي تعرفت على اقارب طروب في ميتيشغان وهم قد هاجروا لاسباب عدة !!
قبل عشرة أيام كنت في دعوة مقربة جدا لثلاثة اصدقاء من سنة ١٩٥٩ ، هم انا وفائز فالح القصاب وصاحب الدعوة نمير علي احسان حمدي !! صداقة واخوة استمرت ستين عاما ، ومن النضال المشترك ولليوم !!
نمير حوصلته صغيره ويه الحواويين !! كعدنه بالطرمة مال شقته الجميله بعمان وقمرية العنب !! اول مكعدت اني ،، چتي بزونة وگالت هلو عمو !!! وكالت !! تقبل يا عمو سيفي ،، عمو ابو هيثم يرگعنه بالنعل يومية !! ابو هيثم ، نمير ، لا يحب البزازيين وعنده حساسية من جهالنا واجيالنا الجديدة !! ميخاف من الله !!
بدل من ان ينطينا حصة وحليب للاطفال ويدارينه ،، گام يرگعنه نعل يومية !! واني اعرفك بنفسي البزونة أشواق بنت عمة حبك البزونة طروب !!
بكل ألم وشوق قالت البزونة أشواق !! في ليلة مظلمة باردة ولدت اربعة بزازين من الهر عياش ،، عياش تركنا وهاجر !! بقيت انا وبزرته الاربعة في طرمة عمو نمير ، نلتمس منه الحنية !! وقلنا له ،، الخاطر الله، أستر علينه ،، مثل ما ستر عمو ابو عبدالله خالة طروب بنت خالنا الهر الركن المهندس اباقه ،، وفي بغداد !!
حچيت ويه نمير ،، وكتله ،، خطية ذوله هم منشورين علينه لتصير دكتاتور وقاسي مثل رشدي اباظة من حطم قلب لبنى عبد العزيز ،، وخلاها تركع بالاخير !!
نمير ،، اجاب بكل تكبر !! تقارن رشدي اباظة بيه !!
أشواق البزونة ،، نطنطت وگالت بنفاق ،، عمو نمير يسوه رشدي اباظة مليون مرة ،،
كلتلها ،، بالعافية عليج ابو النعل !!
اليوم ظهرا ،، اتت بزونة غنوج تتمقلج وانا حاير بزماني وضغطي معلك لابو موزة !! وقالت في باب العمارة !! مسيو ابو عبد الله !! انا بنت عم أشواق طربگه ، البزونة المعشعشة يم بيت عمو نمير !! وقريبة مدللتك طروب لبگات !! بلكت الزبل مالتك تخلي بالباب !! اني اخرب على مصمصة العظام !!!
اني زهگان وگيج ضغط الدم معلك !! كلتلها هذا الكارت مالتي ،، اليوم مالي خلك ،، فد يومين خابريني حتى احل الازمة الغذائية !!
گالت ،، ثانك يو ،، اي ام غلاد اند هاپي ،، بلغة البزازين !!
بعدين تذكرت ، اني انطيتها الكارت و رقم التلفون الارضي قبل ثلاثين عاما !!
وره شوية ، رجعت اشواق مزنبرة وبيدها جكارة ،، وگالت ،، تلعبني مو !!
تعلمت الكلاوات من كوفي وبان كي مون !!
كلكم مكروهين !!! خاينين ، غشاشين!!
كلتلها ،، لو ادري طروب عدها هيجي كرايب برابيك ،، جان عگدت مبايضها !!

تحياتي للجميع ...