سيف الدين الألوسي
لتغيير المزاج !!!سندي ،، السيامية الفالتون !!
بين سنة ١٩٧٢ ولغاية سنة ١٩٨١ كان لابن عمي عاكف بزونة سيامية مطعوجة عديمة الاخلاق شايفة روحها كأنها كاترينا زيتا جونز من چانت شابة مو هسه !!
المهم هذه البزونة الادبسز كنت أنا وياها حية وبطنج ،، عقلي يطير منها ،، عند زياراتي المتكررة لبيت عمي المرحوم الدكتور خليل الالوسي وكعدات الشط بالصيف وكعدات الشتاء الحلوة ،، اول ما ادخل لغرفة الكعده الگيها متمددة هذه البربوك على القنفة ، ومتعرف الأصول وتسوي نفسها مشافتني !! اكوم بعدين اهفها بنعال لو اكفخها حتى تنزل من القنفة ، وييجي بعدين حبيبها عاكف ليتناگر ويايه ، وليش هفيتها بالنعال لو ليش كفختها لهل البومة !؛؛
المهم عقلي كان يطير منها واني أيضا لا احب البزازين بصورة عامة ،، برابيك اصليات .
بقيت هذه البومة آنسة مصون ،، وكل ميجيبون فحل هيبة سيامي ، لو تخرمشه لو ترزله ومتنطي كل وجه ، وبعدين يجي صاحبه للهر يأخذه لفشله في كسب قلب سندي الغبره!!
كان لدى بيت المرحوم الدكتور حسني الالوسي هر سيامي مرتب خريج هارفارد وسيم ومسوي شعره تواليت ومبوز!!
اتفق دكتور عاكف معهم على استضافته لمدة أسبوع في بيته وبلكي تصير القسمة ويدخل بحسناء الشاشة سندي كونه مثقف ووسيم ويعرف شلون يقره الغزال !!
خطية عاكف فرغ غرفة عل الشط ببيتهم وسوه جو شاعري وموسيقى رومانسية ، وخله ضوه احمر وشموع ، وجرچف كلبدون وستن ، ومخاديد ريش ، ومله البانيو إذا عجبهم يسبحون !!!
اجه الهر السيامي وجبناله مزيقه عبد الرزاق مزيقه جي ،، وزفيناهم للكبه ،، وحضرنه كاهي ودبس وگيمر ، ولحم ضلوع مشوية مال هرفي، وباكيت حبوب جينسينغ ، وبطلين واين معتق وشامبين وبطل كونياك وباكيتين مارلبورو احمر للعريس وباكيتين مور نعناع للبومة العروس !!!
اول يوم والكل منتظره بياض الوجه ، ومنشوف الا المسكين الهر مترزل ويهج بطرك روحه العزيزة وبعد أن فشلت كل محاولاته للتقرب من هذه البربوك الصدك !!
رجع المسكين لبيتهم شعره مخربط ويدردم مخنوك بالف عبرة .
بقت هذي الادبسز شايفه روحها وعاكف حابسها بالبيت إلا أن فد يوم فلتت وطلعت للحديقة !!! اشو وره فترة بينت عليها علامات الحمل !!! صدك جذب ، منو هذا الادبسز اللي قشمرها ؟؟
طلع هر عتوي معظماوي كريم العين اصفر اللون مرگوع بصجماية بعينه !! حبته من أول نظرة هذه البومة !!
المهم بعد فترة مبقت بزونة بالمحلة محبلت من هذا العتوي ذو الشخصية الجذابة واللسان المعسول !! ولهذا السبب مخله حصره بقلب بزونة !!
بعد فترة خلفت سندي بزازين مشكل يا لوز ، قسم بيض ومطكعه باصفر وقسم اسود وابيض وقسم يشبهون اعمامهم ولا واحد طلع يشبه أمه لو خواله وخالاته !!
عاكف كام يكفر وربى النغولة بكل حنية ونكران ذات ،، المهم هذي الادبسز تعلمت على الشغلة ويومية جايبة هر غريب للبيت ، وتحبل من عنده إلا أن كفرته لعاكف وبعدين تزوج ولما تزوج انهزمت من البيت ودون ترك رسالة ولا كلمة شكر ووفاء وراحت داحت بشوارع الصليخ ويه شكو هر سرسري !!
ويكلك ليش متحب البزازين وتحب الكلاب فقط !!
هذه لو كلبة جان كامت تطبخ وتغسل هدوم وتنظف البيت لعاكف ،،،
اعذرني ابن عمي لكشفي سر من أسرار الدولة كشفته مثل الوثائق المهمة للخارجية البريطانية بعد ٥٠ سنة .
كل الود للجميع
665 زائر، ولايوجد أعضاء داخل الموقع