ما ... جـيـت

التفاصيل

تم إنشاءه بتاريخ الخميس, 29 آب/أغسطس 2024 09:32

كتب بواسطة: ميسون نعيم الرومي

 ميسون نعيم الرومي

ما ... جـيـت

توعد او تخلف بالشته
وادگول اجيلك بالصيف
مر الخريف ابدمعـته
اطيور التحبهه هاجرت
دنيانه كلهه ضهضبت
الروح تعـبهه البعـد
والعين تربي اوحنيت
والزمن يلمع چن سيف
وانت يعيني موفيت
واخلفت وعدك ماجيت
ما جيت
***
جانه الشـته هالمعتـني
امگـبـّع ايهـِـد او ينـثـني
-(اللحـيه) و(ازلوفـه) ثـلج
يـنـفـخ ارماده .. يـوج
اللسنـيـن تاكـل بالعـمر
اتعبنه يروحي .. اوما نمل
لاشـفـْـنه مـنـّـك مرسـال
ولا اسمعنه صوتك يا حيف
وانـت يـروحي موفـيت
واخلفـت وعـدك ماجيت
ما جـيـت
***
جانه الربيع ابضحكـته
والدفـو هـل ابوجـنـته
فاح العـطر والقـِداح
والشمس غنت افراح
انجوم السمه ما تنلاح
نـَـدَّه النـِـدَه ع الورد
والدنـيـه صارت اعياد
-(بـعـيـونه) سـِـمَه والبحر
خايـف أنـَه امن الحساد
واخلفت وعـدك ماجـيـت
ما جيت
***
راح الربيع اوهم مضه
ودعـنه صيف اوشــته
روحي على دربك تصد
يا روحي .. هدنه البعِـد
واتـنطرَك يـمته تجي ؟
لا انت جيت .. اولا اجي
ابـقـَه اناطر وانـتـظر
راح العـمر مـزنة مطر
وانـت يـروحي موفيت
واخلفت وعدك ماجيت
ما جيت
--------------------
ســـتوكهولم
آب / 2024