حچاية التنگال ٢٧٩٤

التفاصيل

تم إنشاءه بتاريخ الأحد, 13 تشرين1/أكتوير 2024 16:34

كتب بواسطة: د.سعد العبيدي

د.سعد العبيدي

حچاية التنگال ٢٧٩٤

الواحد بديرتنا، يروح يمين يطلع شمال چنه يرجع لنفس النقطة.
ديرة عجيبة ياما صارت بيها ثورات وانقلابات وحروب، كلها ترجع لنفس النقطة.
راحة ماكو استقرار وتطور ماكو، حالة خلت ناس تگول داعي علينا الامام الحسين لأن إحنة الي جبناه، وبايعناه وقتلناه. وناس تگول حوبة الملك الي كتلناه والقرآن فوگ راسه، وكل حوبة ترجعنا لنفس النقطة.
وآخرين يگولون مؤامرة دليلها هدوا علينا داعش، چم ألف مختل من كل العالم لعبوا بينا طوبة، ورجعونه ليوره قبل ذيچ النقطة.
ويگولون بعد داعش حتما أكو داوركيسه، يدخلونا بيها، نبقى نلوب، وتاليها نطلع من المكان الي همه يريدوه ولنفس النقطة.
كل هذا وشنو المطلوب ما نعرف، والي ما يعرف ما راح يلگه حل، ويبقى العمر كله يدور مثل حصان الناعور على نفس النقطة.