حچاية التنگال ٢٧٩١

التفاصيل

تم إنشاءه بتاريخ السبت, 09 تشرين2/نوفمبر 2024 16:58

كتب بواسطة: د.سعد العبيدي

د.سعد العبيدي

حچاية التنگال ٢٧٩١

بغدادي حِلَمْ چنه عايش بقصر على دجله، وچن العراقيين بآخر مقياس سعادة طلعوا الشعب الأسعد بالعالم وچن كل مشاكلهم انحلت بقدرة قادر:
الحكومة صارت تكنوقراط أصلي وبعد ما تفوتها فايته، وقلصت الفجوة التقنية مع الغرب وتفوقت على إسرائيل. والبرلمان لغى امتيازاته وأنهى المحاصصة، وآخر قانون شرعه الرفق بالحيوان في هذا الزمان. ووزارة الكهرباء أسست شركة عالمية تفوقت على سيمنس وجنرال الكترك، حلت مشكلة الكهرباء برمشة عين وزيدت الانتاج عشرة أمبير، اقترح المعالي تصديرها لإسرائيل جوه العباه بضعف السعر المحدد للمولدات. وبغداد صارت أنضف من زيورخ. وتعليمنا ينضرب بيه المثل وعالمنا الجليل الخبصاوي إكتشف زرف بالثقب الأسود غير نظرية خلق الكون، وزميله السكتاوي أثبت أن عذاب القبر يشمل الكفار فقط. والاقتصاد طفر طفرة إبن رعين وبعد ما نحتاج النفط، وتنفذت خطة القائد (كنز الفلوس للجيل المتعوس). والبطل منگاش بعد ما وگع الطيارة بالبرنو اخترع آلة لتكثيف البخار المصاحب لدخان النرگيلة وتحويله الى مطر، وضخ الزايد منه شلع دَيَنْ لتركيا وايران. فز أخونا من الحلم على صوت المذيع يگول العرب الأمريكيين انتخبوا ترامب الي فاز برهاوة. صفگ ايد بإيد وصاح چانت عايزه وتمت!.