اجـلبـنـك

التفاصيل

تم إنشاءه بتاريخ الإثنين, 18 آب/أغسطس 2025 06:07

كتب بواسطة: ميسون نعيم الرومي

 ميسون نعيم الرومي

اجـلبـنـك

اجلبنك يليلي والگلب سابيني

حسبه اجيبني وحسبه توديني

الاوي بالصبر والصبر يلويني

كلش صلف مايعرف العيبه

اجلبنك يليلي الف تجليبه

****

اجلبنك يليلي اوتيهيت الراي

الـمّـنهَه اوتطش متعانده وياي

كافينه هضم اتوسلچ دنيايَ

خلصنه العمر بالآه والخيبه

اجلبنك يليلي الف تجليبه

****

اجلبنك يليلي والسهر خاواني

اترجه الجفن والنوم جافاني

قسه حيل الوكت والعجب راواني

واصوابه كلف ماعنده كل طيبه

اجلبنك يليلي الف تجليبه

****

اجلبنك يليلي وامعاتت آنه اوياك

تحفر بالزمن واتجيب هاذي واذاك

تنسه؟ ابد متگلي ليش اشجاك

عذبت الگلب جتك امصيبه

اجلبنك يليلي الف تجليبه

****

اجلبنك يليلي والوطن راح اوضاع

اضباع افترسته..لا ابد موش اسباع

واحدهم نذل لا يشبع اولا ينصاع

واليكره وطنه شلون بالله اتطيعه

اجلبنك يليلي الف تجليبه

****

اجلبنك يليلي والشعب نايم نوم

تعلم ع الظلم ماعنده بس اللوم

يلطم لطم..والعيشه ع المقسوم

ما يرضه الحسين النهجه كله اتبيعه

اجلبنك يليلي الف تجليبه

****

اجلبنك يليلي والحچي ضايع

يرضه اشلون؟ بالله الفقير الجايع

سيطر ع الحكم سافل للوطن بايع

واليكره وطنه ارصاصه ريت اتصيبه

اجلبنك يليلي الف تجليبه

****

اجلبنك يليلي واتمعنه باللي صار

عقدين امن الزمن بالوطن شبت نار

خرفان صرنه.. والحبل بيد الجار

يلعب لعب ياعيبة العيبه

اجلبنك يليلي الف تجليبه

****

اجلبنك يليلي والدنيه دواره

نترجه الفرج وانريد البشاره

كافيكم بعد كلمن اله داره

خلصنه العمر بالآه والخيبه

اجلبنك يليلي الف تجليبه

………………………
آب / 2025

ســـتوكهولم