لو يعدموني مثل زلخا أباب الشرجي أظل أگول الحق و ما أخاف /١٧

التفاصيل

تم إنشاءه بتاريخ الأحد, 09 آب/أغسطس 2026 07:22

كتب بواسطة: أبو حمودي البغدادي

أبو حمودي البغدادي

 لو يعدموني مثل زلخا أباب الشرجي أظل أگول الحق و ما أخاف /١٧

- خير ان شاء الله أبو حمودي أشو اليوم شايل كتاب؟؟

ايوالله كتاب تأريخي ، البارحة قريت نصها واليوم اذا صار عندي مجال اقرأ البقية بحيل الله.
- وحول أيش الكتاب؟؟
حول حياة واستشهاد الإمام الحسين عليه السلام.
- خوش كتاب ، ياترة المصادر البالكتاب صحيحة؟؟.
مية بالمية ما بيها مبالغة وتحيز أشوفه أحسن المصادر.
- وشنو القريت من الكتاب الى آلآن؟؟.
قريت استشهاده بوحشية وحياته :
استشهد في العاشر من شهر محرم عام 61 هجري.
ما يعادل 10 - 12 شهر تشرين الاول عام 630 ميلادي.
- نعني صار كم سنة بروح أبوك؟؟.
بالضبط قبل 1396 سنة بالتمام والكمال.
- والله هواية يا فحل .
أكيد بس الرجل أنظلم و الأهم مكانته و منو و ابن من وسبط من؟ مع ذلك يعتبر استشهادة جريمة جبيرة هو عائلته لذلك يطلق عليه سيد شهداء شباب أهل الجنة و يستحق هذا اللقب و أكثر.
- أكيد هذه مايرادلها مناقشة وذلك من الضروي احياء هذه الفاجعة الأليمة.
تمام لكن الأغلبية فاهمين الشغلة غلط وحتى أكدر أكولك يسيئون لهذه الشخصية التأريخية المهمة.
-شلون؟؟.
خوش سؤال .. أسمعني.
* اللطم وسفك الدماء.
*السير مشي أيام وليالي ووياهم حتى أطفال رضع و كبار في السن ومرضى.
*صرف الملايين من الدولارات من ميزانية الدولة (والمادة مو مشكلة جبيرة).
* استنفار الأجهزة وغيرها.
* أدخال مواد مخدرة و ممنوعة داخل العراق بحجة الزيارة.
*دحول اناس مجرمين وحاقدين دخولهم لغرض السرقة واشياء عيب الواحد يحجيها.
*نسوان وبنات بعمر الزهور بحجة الزيارة كل يوم تعقد على أشخاص نعني بالقلم العريض زواج المتعة ، وهناك سماسرة من رياجيل ونسوان يعلنون صراحة عن استعدادهم للقيام بهذه العملية مقابل دولارات مو دنانير عراقية!... نعني تجارة وسخة وملعونة!!.
*انتشار امراض جنسية للظالين ودون مراقبة صحية او اخذ احتياطات لهذة العملية.
وهذا الكلام مو افتراء ، لا والله هذه اغلبها امسجلة صورة وصوت ودون مستحى، شفت فيديو واحد يكول لأحداهن جاية من ايران مشي:
زوجتك نفسي لمدة نصف ساعة وهي الخاتون تكرر الكلام وتصبح حلال عليه لهذه المدة واذا بقى أكثر العملية تصبح زنا و الله مايقبلها!!!.
الله عليكم هذا كلام؟؟ اكو واحد يتقبل هالكلام وهالمسرحية السخيفة؟؟.
- أبختي الف لاء.
هساع كل واحد حر بتصرفاته بلاكد لايربطوها بزيارة سيد شهداء اهل الجنة الأمام الحسين ..(ع).
_ ماحجيت غير الصدك.
والله العظيم أنقهر من هاتصرفات بس شبيدي غير القهر!!.
-لاتنقهر ابو حمودي قهرك ما يغير شىء غير تأذي صحتك.
أكيد.
- تعال يا ولد جايات وحامض لأبو حموي الورد.