حچاية التنگال ٣١٣٩

التفاصيل

تم إنشاءه بتاريخ الأحد, 09 آب/أغسطس 2026 16:24

كتب بواسطة: د.سعد العبيدي

د.سعد العبيدي

حچاية التنگال ٣١٣٩

كل هذا النفط الإيراني الي باعه العراق على إنه نفط عراقي، إلى أن انكمش متلبس. وكل هاي المليارات من الدولارات الي عبرتها الفصائل المسلحة لإيران، إلى أن انفضحت. وكل هاي الملايين من الزوار الي يطبون العراق، ياكلون ويشربون ببلاش، ويفركون رجليهم ويدهنوها بنزاكه وإخلاص. وكل هاي المسيّرات الي انطلقت من أرض العراق بالنيابة عن إيران، وضربت أهداف بدول عربية جارة، إلى أن انقصفت قواعدها. غير التنسيق، وتصريف البضائع الإيرانية، وإعادة التصدير، وتمرير السلاح لحزب الله، وتنفيذ التوجيهات السياسية والطقوس الدينية، وغيرها هواي... ما غزرت؟
لأن من طلب العراق منهم، وبالتواسيل، يستثنون نفطه من منع المرور من هرمز، وخزينته خاوية وشعبه يختنگ، ما وافقوا، وگلوله: لا، هاي ورقة ضغط استراتيجية نضغط بيها على أمريكا بالحرب وياها. وهنا كل الي نگدر نگوله: الصوچ مو من إيران؛ إيران تشوف مصلحتها وتشتغل إلها. الصوچ من العراق، الي سواه الوكت وحملة السلاح من أهله، على گولة عريان السيد خلف: ناعور... بس أترس وأبدي.