لإنك بنت ..

التفاصيل

تم إنشاءه بتاريخ الخميس, 26 كانون1/ديسمبر 2013 10:14

  الشاعر/احمد مطاوع ـ مصر

فـ مش لازم يبان صوتك ..

مفيش خروجات ..

تدارى الأهه فـ سكوتك ..

تشوفى الويل ..

ولا تجادلى ولا تشكى ..

و إن حبيتى يوم تحكى ..

بلاش تفاصيل ..

لإنك بنت رغايه ..

بـ ترغى كتير ..

و إن جيتى يوم تبكى ..

يكون بالليل ..

عشان دمعك ميظهرشى ..

لإنك بنت ..

فـ مش لازم يكونلك رأى ..

تعيشى بس بـ أوامر ..

مفيش أنا شايفه أو عايزه ..

مفيش لا عمرو ولا تامر ..

لإنك بنت ..

فـ متحبيش ..

و إن جالك فـ مره عريس ..

هـ نقرر و متجادليش ..

لإنك بنت ..

بلاش المشى فـ الشارع ..

يكون لبسك كده واسع ..

تخافى و تكرهى جسمك ..

عشان عيل بـ يتمايع ..

لإنك بنت ..

الگاردينيا: الشاعر/ احمد مطاوع....