هيفاء وهبي تحارب “داعش” بطريقتها الخاصة!!
ياجماعة الخير لاتستغربوا من الخبر.. قرار نهائي من الفنانة اللبنانية ( هيفاء وهبي) ان تحارب أقوى جماعة ارهابية متطرفة في العالم!!.
ياترى شلون؟؟
هُم من أصغر دولة بالعالم الى الدول العظمى ودول الشرق الأوسط واسيا وأفريقيا والأمريكيتن كلها داخلة حالة انذار والكل تريد القضاء عليهم ولكن التقارير الرسمية لدول كلش كبار ادگول هذه بحاجة الى سنوات وسنوات!!.
حيرة و الله لايحير عبده.. خوش ياترى شلون نعني بطريقتها الخاصة!!!؟؟.
مثلا وهذه كلها تحاليل(جمع تحليل بس مو مختبري!!) لامن وكالة المخابرات الأمريكية ولا الروسية ولا الهندية.
- يجوز ترتب حالها و تصفف شعرها وتلبس بنطرون جلد ضيق كلش عالأخر و تتواعد مع الخليفة البغدادي وتروحله وتسهر ويا و حچاية منا وحچاية منا والأخ أمير المؤمنين شلون يفوتها و يرجعها الى اهلها مثل ما اجت ..!!؟؟.
لاء يابة لاء مستحيل يسويها ،أكيد نظرة فأبتسامة وضحكة وپيك دبل وأكيد عالسفرة أنواع المقبلات اللبنانية من صحون الفتوش و التبولي وبابا غنوج والكبي وجاجيك بالثوم وكاسة لبلبي و باگلة بالبطنج و شياشة تكة دجاج ولحم ومثل ما تعرفون نار وبنزين لابد من لقاء حميم .. وبيني بينكم هنا البداية..كون الفنانة بخبرتها في هذه المجالات ( لاتفكرون بعيد!!!) قصدي بالدبلوماسية ممكن تقنع الأخ ابو بكر البغدادي أن يأمر جماعته ويگوللهم:
ياجماعة الخير .. كافي.. الف عين لأجل عين تكرم .. خلونا أنبطل من هالشغلة كلمن الى بيته وأني راح أخذ الجميلة هيفاء ونحمل هالمليارات ونعيش عيشة سعيدة وتجيبلي درزن اولاد وبنات!!.
وبذلك گدرت الخاتون ( هيفاء) القضاء على داعش و ماعش وبأسهل وأرخص و أسرع طريقة ما خطرت لا على بال بوتين و أوباما لابل حتى البروفيسورعمر البشير والعلامة أمير مشيخة الكويت!!.
لاء.. هذه تشكل خطر على حياة هيفاء.. ما أظن تسويها لابد أنها أمحضرة خطة أقوة بهواية ياترى شنهية؟؟.
راح تشكل جماعة من المقاتين الأشداء نعني محاربين من الدرجة الأولى وهذه بعدما تنشر على صفحتها الخاصة وتعلن عن تشكيل هذا التظيم..تعرفون شيصير؟؟؟..بلا گولوا شيصير؟:
وكيلكم أبو خيمة الزرگة خلال 24 ساعة راح يطوع مليون شاب من الدول العربية والأسلامية لابل حتى شباب بوركينا فاسوا راح يرسلون برقيات تأييد ويعلنون أستعدادهم للقتال ضد أية جهة تحددها المارشالة هيفاء وهبي..!!.
عشرات الأعلانات في الصحف والمجلات والفضائيات:
عار عليكم أيها الشباب اذا ما تلتحقوا بجيش المارشالة هيفاء وتلقون العدو درسا بليغا وهذ كلها ببركاتها وهي تتقدمنا ونحن من خلفها!!!.
مو بس مقاتلين.. لاء هنالك فرق فنية شعبية غناء ورقص و موسيقى.. يگولك هز الرگبة وطگ أصبعتين بفلس .. لعد شلون؟؟؟ اكيد هيچ جيش جرار بحاجة الى ترفيه واستراحة وفرق كاولية على رأسهن (ساجدة عبيد و حمدية صالح و بناتهن) ، و چيلات للصبح .. وبين فترة وفترة تطل المارشالة هيفاء وتاخذلها گشه وتشعل الحفلة وتنگلب الدنيا..يايابة شلون جو أمكهرب عالأخر؟؟؟لعد شلون قابل جيش محمد العاگول؟؟؟.
زين.. والأسلحة والمعدات والأكل والشرب و التدريب و المعاشات ..هذه كلها منين؟؟ .
هذه بسيطة.. أمدبرة من أول يوم.. گولوا شلون؟؟؟.
غمزة وحركة بمؤخرتها لأمراء الخليج.. (كل الخليج العربي من غير أستثناء) راح تتحرك و تشتغل التبرعات:
- جماعة تتكفل بالأكل والشرب.. أكل درجة اولى كبسة لحم وكبسة دجاج.. وهنا المقاتل حر يختار كبسة دجاج لو كبسة لحم؟؟.. أكيد كامل الحرية... ومو بس هذه مرة بالأسبوع يقدمون ( كوسكوسي) وهذه تطبخها المارشالة هيفاء بنفسها..بس شلون كوسكوسي؟؟!!.. تخبل.. خو هذاك اليوم الكل تطلب كوسكوسي!!... يموتون عالكوسكوسي.. ماكو مثلها بالدنيا!!.
- جماعة تتبرع بالشرب (لاتروحون بعيد الحركة اللي تقودها هيفاء تحرم الكحول بكل انواعها) ..نعني ماء مالة بطالة بلاستك.. كوكا كولا ..عصائر..وممكن بيرة اسلامية أيام الخميس و الجمعة.
- جماعة تتبرع بأنواع الحلويات.. تمور ، بقلاوة ، زلابية..لقم ، كنافة بالجبن..الخ.
- جماعات وحكومات ومشيخات يتبرعون بأسلحة ثقيلة( دبابات ، مدرعات ، رشاشات رباعية صواريخ تاو..الخ).
جماعة تتبرع بألبسة وملحقاتها و احذية و مسدسات وواقيات رصاص ..الخ.
- جماعة ترسل مدربين..يگولك صايرة لخة الكل تريد تدرب وتاخذ توجيهات من المارشالة هيفاء ويجتمعون وياها تحت الخمية كلش ، انشاءالله اربع وعشرين ساعة.. ياجماعة الخير حقهم..
وهكذا تكمل السبحة ومايظل غير الأيعاز من المارشلة ببدأ الهجوم الكاسح ..
وعيونكم ماشافت .. المارشالة ليگدام شايلة العلم والجميع قادة وضباط ومراتب (وراها وراها وعيونهم عالهدف!!) والى ألأمام ............الله أكبر..الله أكبر..
وهناك على تلة تظهر الفنانة اليسا وهي تنشد( موتني .. موتني..*) بيش تريدون أحلفلكم التقدم يستمر وجيش العدو ينهار ، جماعة جماعة يعلنون التمرد على داعش وينظمون لجيش المارشالة هيفاء بس بشرط كلش سهل.
شنهو الشرط احچوهة يا خلك الله:
يريدون ثلاثة مرات كوس كوسي بالأسبوع!!.
بسيطة خلونة ناخذ رأي المارشالة هيفاء..
ياجماعة الخير .. ابشروا.. المارشلة أدگول لا كبسة ولا تشريب بعد اليوم .. بيكم خير وأشبعوا كوس كوسي!!...بس خلصونا من داعش..سأوفر الكوس كوسي للجميع!!.
لو بس أعرف ليش العرب يخربون عالكوسكوسي وبالأخص على الطريقة المغربية و اللبنانية وما يفكرون بغير شىء!!؟؟؟.
وأني أردد وأگول:
كريم الإيد ينطي البيده وهبي
صرنه بين داعش بين وهبي
وينچ صرتي ياهيفاء وهبي؟؟
ها اخوتي ها -
هذا الموصل كـَّـله اينادي...
هذا الموصل كـَّـله اينادي-
مـَـدْفـَـع هـَـيـفـَـه ايحرر بيه
-------------------
ياجماعة الخير أدعو دعاء گولوا آمين:
ياربي بدل من هالملوك والرؤساء والشيوخ وألأمراء أنطينا خمسين هيفاء وهبي..أكيد راح تتعدل الأمور وأنعيش بسعادة .................. گولوا آمين..
في أمان الله..
* المغنية اليسا بدلا من أن تردد( موطني.. موطني) رددت: موتني.. موتني!!وهذه موجودة على اليوتيوب... والله عشنا وشفنا.. موتني... موتني!!!
809 زائر، ولايوجد أعضاء داخل الموقع