تصريحات إبراهيم الجعفري حول صناعة الأزبري!!

التفاصيل

تم إنشاءه بتاريخ السبت, 19 كانون1/ديسمبر 2015 09:57

كتب بواسطة: جلال چرمگا

تصريحات إبراهيم الجعفري حول صناعة الأزبري!!

  

الأزبري: للي ما سامع عنه..نوع من أنواع المثلجات أيام زمان ،من كنا أطفال نصنعها بأنفسنا وكانت في غاية السهولة:

انجيب قوطية چبيرة وأنخلي قوطية أصغر بداخلها وانحط بيناتهن ثلج ( نشتري ربع قالب بخمس و عشرين فلس..فلس ينطح فلس) وأنرش على الثلج ملح خشن حتى لايذوب بسرعة.
وچنا نقوم بعملية دوران ( فر) للقوطية الصغيرة وهي مملؤة بنوع من أنواع الشرابت وطبعا هم نصنعها بأنفسنا صبغ وشكر وماي..والله وياك عبوسي!!كله محلي ماكو استيراد اطلاقاَ!.
يا يابة شگد چانت طيبة..ولكن مقارنة بالمثلجات الموجودة حاليا اللي بالحليب والمكسرات و الكاكاو والفنايلا وبطعم الفواكه وغيرها..اكيد ماكونسبة.. هكذا قضينا طفولتنا.. حشاكم من عابت ذيچ الطفولة!!.
نرجع للأخ / ابراهيم الجعفري وتصريحاته العجيبة والغريبة..
في كل العالم هنالك شروط للي يستلم وزارة الخارجية بسبب حساسية هالمكان واتصالته مع العالم الخارجي المتحضر.. والسفر الى دول عظمى و تواجده في أروقة الأمم المتحدة وگعداته ويه الوزراء وكبار مسؤلي دول العالم!!
على سبيل المثال بمصر لايمكن لأي كان يصير وزير خارجية اذا ماكان قبل مشتغل سفير..لامو بس أي سفير وهذه هي!!....لاء لازم مشتغل سفير في دول عظمى لسنوات ولابد من أن يجيد لغات أخرى عدى العربية..
في عراقنا الديمقراطي (كلش للوحة!) ماكو هيچ كلام.. يا هو القوي يسيطر عالخارجية لكون سمعة چبيرة للحزب اللي ينتمني اله الأخ الوزير وألأهم بيها خوش خبزة!!...نعني لاتستغربوا فد يوم نسمع الأخت الدختورة حنان الفتلاوي لو عالية نصيف وحدة منهن صايرة وزيرة خارجية!!.
شنهو المانع ؟؟ المهم أرضاء الطرف الأخر..يا حبيبي!!
اللي يراقب الأخ اشيقر الجعفري يشوف ويكتشف العجب.. الأخ يمكن گايم بيه گازكيت!!.
واللي ما سامع هالمصطلح ماكو مانع انوضحله:
من يگوم الگازكيت بالسيارة ادگوم تخبط ماي ودهن!! وهذه كارثة السيارة ادگوم تخربط نعني ششبيش وما تطاوعك.. نعني خربانة.. نعني بحاجة الى تبديل وصيانة وفيترچي وانتظارو مصاريف ووقت ، بأختصار مصيبة وتنزل على مالك السيارة..
الأخ الجعفري أنا متأكد مية بالمية گايم بيه گازكيت وهو مايدري يظل يمشي ..يخربط مايهم المهم لايوگف..
الحكومة والبرلمان والرئاسة مايلاحظون الحالة يشوفوها طبيعية لكون الجميع گايمة گازگيتاتهم من غير أستثناء ..أبوالطبل مايعرف بأبو مزيقا!!
زين..والشعب؟؟؟
لا العراقي أمفتح باللبن يعرف زين.. ينتقد.. يحجي .. يكتب.. بس منو يقرأ و منوا يكتب؟.. لذلك هم يمل ويسكت، وبعينه يشوف وزير خارجية المحاصصة يخر دهن وماي  وعلى عينك يا تاجر!!.
بالله عليكم أكو طبيب وعايش بقلب لندن لسنوات طويلة و حملدار حجاج هم في لندن ومايعرف لغة أبو ناجي؟؟
الأخ لأنه گايم گازكيته مايعرف شىء كوزير للخارجية.. أما بالعربي ؟؟لاء فلتة زمانة.. يا سيبويه ويا مصطفى جواد؟؟
أسمعوا و لاحظوا ..مثلا في احدى المناسبات كال:
الحقيقة ان ديمقراطية الزمن المتحضر لابد أن تكون بمستوى نظريات ميتافيزيقية المشاورات المحدقة في أي مكان.. وهذا بالتأكيد يؤثر تأثير ايجابي نوعما على ألأهداف المنشودة في داخل المجتمعات.....أنتهى كلام الأخ الوزير
يابة ..أغاتي.. عيوني أسطة إبراهيم انت نسيت تختمها بسلمتهم يا أم حسن!!..لعد شلون قابل گوترة لو فرطنة؟؟..عمي عوف الخارجية وشكلك فرقة للغناء والطرب..
أيها ألأخوة الأعزاء نحييكم ونقدم لكم مطربا أفتر كل العالم و عاش لسنوات في الغربة ... معنا في هذه الحفلة أعضاء فرقته الذهبية : عباس العرقچي كعازف كمان.. أبو الدمبك خضير الأگرع وعازف العود نعيم الأطرش وناقرة الچمبارات واللي تهلهل حسنية العورة ..المشرف على التسجيل مهندس الصوت / مشخوط العربنچي!!.
 شوف شلون يلتمون عليك والله العظيم مبيعات أغانيك بالمليون بالأخص اذا جريت سويحلي وتختمها بأغنية عناي الجيت الدارك جيت أشتكي من نارك..!!.
هااا نسيت أكيد بعد هذا الكاسيت راح يلقبوك بسفير الأغنية العراقية .. وااي.. وااي.. أضرب بعد شتريد أوتوماتيكيا صرت سفير؟؟.. وهناك تگدر تخربط بكيفك وإلا مسألة تكون وزير خارجية أشوفها واگفة كلش و تعدي على تأريخ وزارتنا!!.
رزم نوري بريدي.. بيض ، ضفدع ، لبيد في لبنان.. بدري بدين ، نوري رزين ، زادي زبيب!، مرزوق بزاز ،قدوري براد، من دق بابنا ،قدوري دق بابنا!!..
الف حيف بعد الباشا نوري السعيد ، ياسين الهاشمي ، توفيق السويدي، علي جودت الأيوبي، محمود صبحي الدفتري،عبدالمحسن السعدون، نصرة الفارسي، أرشد العمري، محمد فاضل الجمالي ، برهان الدين أعيان، عبدالجبار الجومرد،عبدالله الدملوجي ،حمدي و مزاحم الباچچي، هاشم جواد ، شاكر الوادي ، عبدالرحمن البزاز .. يجيبون واحد كايم بي كازكيت ويخلوا وزير خارجية العراق.. الف وسفة و وسفة!!.
أخوية عوف الخارجية وخلي الخبز لخبازته.. اودعناكم لاتنسى أخذ نصيحتي وشوف الفرق!! ؟؟...وكيلك أبو خيمة الزرگة تصريحاتك وخربطاتك وگازيتاتك مثل أزبرينا أيام زمان لابل أحنة چنا أحسن لكون كنا أطفال مو واحدنا دختووووووووور!!.
رئيس التحرير

• < السابق
• التالي >