بالعظيم بس تگعد على هذا الكرسي بعد ماراح تشوف وجهي!!!

التفاصيل

تم إنشاءه بتاريخ الثلاثاء, 04 نيسان/أبريل 2017 19:29

كتب بواسطة: جلال چرمگا

بالعظيم بس تگعد على هذا الكرسي بعد ماراح تشوف وجهي!!!

كرسي الرئاسة مو عبالكم كرسي عادي ، لاوالله ممكن أنسميه مغناطيس ، وياويلي اللي يگعد عليه!!.
اليضوگ يبلش بعد مايهدها لو يجي القُبيس!!.
بدولة من الدول(نسيت أسمها) ، مجموعة من العمال شغلهم تالي الليل ينظفون غرف قصر الرئاسة.
وكان رجال و زوجته مختصين بنتظيف وترتيب غرفة سيادة الرئيس.
وهذه المهمة موسهلة أكيد الزوجين رشحتهم مخابرات البلد وبعد ما تأكدوا من اخلاصهم وحبهم للقائد الأوحد ومالك الشعب وألأرض و الماي ،يلا خلوهم بهيجي مكان وأنطوهم هالمسؤلية الچبيرة.
فد ليلة وكالعادة بدوا بكنس وترتيب غرفة سيادته ولا أرادي الرجال ما أدري شلون راد يگعد على كرسي الرئيس!!.
لمحته زوجته وصاحت به:
-دير بالك تگعد والله العظيم بس تگعد لازم فورا نطُلگ ،  وجرب وشوف!!.
أنجفل الرجال وتعجب ياترى ليش؟؟
- لانه كرسي سيادته وممنوع يگعد عليه!!؟
- تخاف على لايروح يدخل أحد أفراد امن الرئيس وتحدث كارثة!!.
 لو لويش؟؟.
المسكين عدل روحه وسألها:
- شبيچ يامرة شجاچ؟؟.
گالتله:
- أخاف عليك وعلى جهالنا ووضعنا ، هذا الكرسي مسحور بس تگعد عليه تنسحر وتتبدل مية وثمانين درجة تنصاب بداء العظمة وهذا المرض ماله أي دوا غير طلقة بالگصة و الله وياك عبوسي!!.
گوللي أكو واحد گعد عليه و ماصار فرعون؟؟
أكو واحد ضاگ الرئاسة و ما نسى الماضي والشعب والوعود الجذابة!!؟؟.
هذا الكرسي يخلي اليگعد عليه يصير نرجسي و ياما ابن كتل ابوه لو ازاحه من السلطة حبا بهذا الكرسي!.
دخيلك أبتعد خلينا أنعيش مثل الأوادم ، الله يبعدنا من شر هذا الكرسي الأگشر.
رباط الحچي:
أولا كلام ألأخت صحيح مية بالمية واحنة العراقيين عدنا عشرات الأمثلة:
ألأخوة اللي گاعدين بالمنطقة الخضراء وأغلبهم(خمس و تسعين بالمية) واحدهم كانت حصرة عليه يگعد بمطعم درجة ثانية وياكلله وجبة محترمة.
من كانوا معارضة وكنا نسمع ونقرأ وعودهم الجذابة :
- بس نستلم الحكم راح أنسوي العراق جنة.
- نفط الشعب للشعب چا شلون؟! ، معقولة نحرمهم من خيرات البلد؟؟.
- لا نسوي ألأرصفة مرمر و نبنيلهم أنواع الجامعات و المعاهد والمستشفيات لا وأكثر من هاي وهذيج بكل محافظة جنائن معلقة و برج أيفل و ساعة لندن!!.
الحصة التموينية راح أنضيفلها نساتل و فواكه و مربيات و أجبان البقرة الضاحكة وكيري و حليب نيدو و عسل ومعكرونة و دبس وراشي و حلاوة النجف ولبن أربيل وگيمر الحلة وشربت حجي زبالة!!.
وأكبر مثال الأخ الحاج نوري المالكي (أبوأسراء / قدس الله سره) اللي بقدرة قادر وأمريكا و زلماي خليل زادة صار رئيس الوزراء وچبير العساكر والحاكم المطلق بالعراق، بس گعد عالكرسي شفنا شلون(تسودن) وگام يخبط دهن وماي و لا چنه ذاك ابو أسراء اللي كان بالسيدة زينب حسرة عليه لفة همبرگر و ماعون حمص بطحينة ،صار هو وعائلته يملكون المليارات هذه عدا العقارات بالخارج و الداخل ، و طززز بالشعب ومنو أبو باچر خليهم ياكلون ياشعب يا بطيخ؟؟.
ما كفته دورتين چبير العساكر هاكم للأن يقاتل بكل الوسائل حتى يرجع يگعد على كرسي الرئاسة مرة أخرى!!.
لعد مو حقها هذيج المرة من منعت زوجها ان يگعد على كرسي الرئاسة ولو لدقيقة؟؟.
يگولون أبو أسراء و قبله الجعفري ووراهم العبادي أول يوم من گعدوا على الكرسي أمروا مصوري الرئاسة أن يظلون يطگولهم صور الى أن تطلع أرواحهم!!.
صورة باللحية الخفيفة و تلث محابس فضة.
صورة بربطة حمرة وأخرى بزركة وصفرة وكل الألوان.
صورة يم الأمام أبا عبدالله ويطلب منه مراد أن يظل طول العمر ريس العراق كله.
صورة ولازم بيدة توثية ويخبط القيمة والهريسة .
صورة بمجلس النواب وصاير عصبي.
صورة ويه كاك مسعود وخربان ضحك!! ليش ماندري يجوز الأول حچاله نكته عن الأخوة العربية الكوردية والثاني فطس من الضحك!!.
صورة وهو گاعد بغرفة ظلمة كودن الكهرباء مگطوعة وديكتب على ضؤ شمعة، والرجال شبيدة من تنطفي القوة!!.
صورة حاط أيده على صدره أثناء أستقباله لمجموعة من أطباء العراق ، حقه نعني شلون معقولة يصافح النسوان!!.
صورة بأبو نواس وراه لواء من القوات الخاصة بكافة أنواع الأسلحة حتى يبرهن للعالم أنه عاصمتنا بخير وكلها أمن وأمان!!.
صورة بصف طيارة يدگ عليها بأصبعه عبالك ديشتري رگي ويريد يشوفها حمرة لو فطيرة!!.
يا جماعة الخير
مثل ما تعرفون العراقي يعيش أكبر تجربة ديمقراطية واللي أسسها بوش الملعون و فرضها المستر بريمر علينا ، لذلك لابد أن ننطي حق النسوان هم!!.
يعني شعجب بس الرئاسة وكرسي الرئاسة للزلم ؟؟ ، لعد وين حقوق النسوان؟؟
نعني على سبيل المثال:
شراح يصير لو البرلمانية الحبابة (حنان الفتلاوي) هم تگعد عليه ولو لمدة سنة وبعدها تستلمها زميلتها وصديقتها ( عالية نصيف ) هم تگعد عليه سنة لو أكثر نعني قابل هالكرسي حصراً للزلم؟؟.
سؤال وجيه ولابد أن يشوفوله چارة!!؟؟.
الى اللقاء في كرسي اخر.. عفوا الى حلقة أخرى ومودعين باالله!
أخوكم / رئيس التحرير

• < السابق
• التالي >