يامعودة ، ديري بالچ ياحليب؟؟..هذا حليب سباع!!

التفاصيل

تم إنشاءه بتاريخ الثلاثاء, 07 آب/أغسطس 2018 08:42

كتب بواسطة: جلال چرمگا

يامعودة ، ديري بالچ ياحليب؟؟..هذا حليب سباع!!

سذاجة اهلنا وناسنا واصلة الى حد بحيث السكوت عنها مو بس واحدنه يصير شيطان أخرس ،لا والله لازم واحدنه تسودن و صار مايندل دربه!!.

عاد ما نعرف طيحان حظ لو جيل ياخذها من جيل من دون أن يسأل روحه ياترى هذا اللي انسويه صحيح لو مجرد عادة و نتبعها؟؟؟.
بربكم منو يصدگ أن آلآف من البشر يأمنون حق الأيمان أن تراكتور(ساحبة) أمزنجرة مرمية بوسط قرية و محد بحالها بقدرة قادر صارت حديث وسوالف الناس بحيث صارت الساحبة تشور و تحقق المراد بأنواعها:
- اللي يدور على شغل و مالاگي شغل يروح للتركتر ويطلب منه أن يتعين بوظيفة محترمة!!
التراكتور صار مجلس الوزراء؟؟ لو شنو؟؟.
- اللي ما اتزوجت للساع و فاتها القطار تروح وتطلب ان تتزوج من ازلمة زنگين وحلو وصاحب مكانة مرموقة بالمجتمع!!؟؟.
يامعودي تعوذي من الشيطان التركتور شعليه بزواجج؟؟؟.
- اللي زوجها مو زين وياها وتخاف يتزوج عليها.. گُبل للتركتور وتطلب منه أن الأخ لايجوز عليها!!.
بربكم هذه صايرة؟؟.
- اللي يريد يسافر الى بلاد برة و يستقر بأوربا من غير مشاكل والغرق ببحر اليونان ، ..گُبل للتركتور!!.
شنو التركتور تحول الى غواصة نووية؟؟ لو شنو؟؟.
- اللي بنا حوش قاطين ونص ، گبل ورأستاً!! للتركتور حتى لايصاب بعيون الحساد و تنهار البناية!!.
يا معود اتق الباري التراكتور لو به خير جان وخر الزنجار على روحه!!.
- عدد كبير من الطلاب يراجعون التركتور حتى ينجحون بالأمتحانات!!
أريد أعرف شنو علاقة التركتور بالمدارس و الأمتحانات؟؟
وهكذا بربكم عقلية هالناس قابلة للتطور أو علاج؟؟
وقبل فترة قريت بأن الناس بعدد من مناطق بغداد يصورون بأن احدى أعمدة الكهرباء تحقق الأمنيات و كلمن يزوره يحصل على مراده!!.
والله لو مو شخصيا قريت الخبر وشفت الفيلم كان كلت هذه مبالغة و كذبة چبيرة بحق هالأوادم!!.
الأهم في المسألة:
وحدة تعتبر نفسها شايفة الدنيا و ما تتقشمر و كلامها ماشي بالمنطقة ويصدگوها كودن ينادوها بالعلوية!!.
دتحچي لصاحبتها وأدگول:
الف صلوات على النبي ، شلون سيد محترم ، ولچ دادة شفته شوفة عيوني ، نعني يسوي معجزات محد أمسويها!!.
يحقق مرادچ ويقنعچ بسوالفه الحلوة المعسلة ، محد راحله وما حقق مراده والمهم ما يقبل ياخذ فلوس إلا بالگوة أتذبيهن عليه!!!.
- مثل أيش كراماته و معجزاته؟؟.
هاي شنو دادة وحياتچ گدامي جاب گلاص بيه نص ماي ودار عليه ماي رأسا تحول الى حليب و شربه گدامي، اي دادة گدامي محد حچالي لاولله شوفة عيوني!!.
صاحبتها خربت من الضحك بحيث إلا شوية وتختنگ!!.
- شبيچ دادة ليش تضحكين شنو ما مصدگة؟؟.
لا والله أمصدگة ونص وانتِ ليش تروحين بعيد هالليلة تعالي عدنا وشوفي رجلي هم يسوي نفس الشىء؟؟
شنو رجلچ سيد؟؟
لاوالله سرسري و شراب عرگ أبو الكلبچة.. ولچ هذه اللي ادگولين عليه سيد ويحول الماي الى حليب هذا أمر من رجلي هذا شراب عرگ أصلي.
معقولة دادة؟؟.
معقولة ونص ولچ ديري بالچ تشربين من حليبه!! تره رأسا تفقدين والوعي وبعدين ما تعرفين شنو اللي راح يصير و اللي صار!!!!؟؟ ،هذا ملعون ياما قشمر النسوان وشربهن من حليب سباع وعمل فعلته الگشرة وكلها بأسم الدين!.
أعوذ بالله من الشيطان ، نعني هذا اللي بالگلاص مو حليب؟؟
لاء حليب بس حليب سباع ، نعني منكر ، نعني عرگ اللي يسكِر البشر و شربه حرام في حرام!!.
الف شكر عيوني والله گاللي تجربين شوية؟؟ ، استحيت منه وگلتله لاء بالمرة الجاية انشاءالله أتبرك بحليبك مولانا!!.
للأسف مجتمعنا في زمن الحرية وديمقراطية أمريكا وايران مليان من هالشكولات الزفرة ويقشمرون الناس بالأخص النسوان وكلها بأسم الدين وأهل البيت (رضوان الله عليهم) بس الصوچ بينا أحنه اللي ياهو اليجي وقرانا غزالة رأسا صدگنا به و گلنا أي والله نور محمد على وجهه وهو بألاصل واحد طايح حظه و سرسري درجة اولى بعيد كل البعد عن ألاسلام والمسلمين!
وأني أگول:
بالله عليكم مجتمع باهالعقلية شلون يتطور؟؟
أقسم بالله اليوم أحسن من باچر ونعيش وأنشوف آلآف من أبو حليب السباع والتركتور والعمود الكهربائي والهم مريدين واتباع باآلآف لابل أكثر و يدخلون البرلمان و يحكمون البلاد وهذا اللي دنشوفها حالياً!!.
الى (حليب سباع) أخر ،عذرا الى حلقة جديدة في أمان الله.
أخوكم
رئيس التحرير

• < السابق
• التالي >