ولك مادگولي ليش لاحگني؟؟ منعول الوالدين ، ما تعبت؟؟!

التفاصيل

تم إنشاءه بتاريخ الإثنين, 07 تشرين1/أكتوير 2024 19:13

كتب بواسطة: جلال جرمكا

ولك مادگولي ليش لاحگني؟؟ منعول الوالدين ، ما تعبت؟؟!

المشكلة لا بأيران ولا بالشيطان الأكبر و لا بأية دولة أخرى!!المشكلة بينا احنا نعني! بأهالينا بالعراق صايرة لخة ابو الطبل ما يعرف بأبو المزيقا!!.

والنبي يمكن زميلنا رئيس التحرير اتسودن (انجن) وامضيع صول چعابة وإلا شني هالمقدمة المتشائمة!!.
لا يا أخوان لا تسودنت ولا هم يحزنون، مازال وصلت الى هالحد أسمعوني زين:
من يوم احتلال العراق من قبل الشيطان الأكبر و ابو ناجي،سلموا كلشي وكلاشي للأخوة الأيرانيين وهم همينه ما قصروا انطوا ايعاز لعملائهم ان يتركوا طهران ولبنان ولندن ويتوجهوا فورا الى العاصمة بغداد وحتى يلعبوا شاطي باطي ، كلشي حلال عليكم حتى المال العام بناء على فتوى من چبيرهم وشفنا اول ايام الأحتلال شلون هجموا الأنذال الحواسم ومابقوا لاوزارة ولا دائرة تعتب عليهم حتى المسشفيات سرقوا ما فيها الى اسرة المرضى وحتى الأجهزة الطبية ما سلمت منهم و عبروها لخوالهم في طهران ومثل ماشفتوا من ذاك اليوم الى اليوم العراق خراب في خراب.
لاخدمات ولا قيمة للبشر والعملة العراقية من سىء الى الاسؤ والجواز العراقي ماشا الله ولا كهرباء وماي و طرق وجسور ومدارس و مستشفيات ،قضوا على البنى التحتية ومستمرين بالخراب الى اليوم.
أما انتشار المخدرات بين الشباب سالفة ما ينسكت عليها وهذه بشهادة الأجهزة المختصة في وزارة الداخلية.
اهلنا يعرفون كل شىء و واحدهم امفتح باللبن مع ذلك من يجي يوم الأنتخاب الكل تتوجه الى صناديق وينتخبون نفس الشكولات الزفرة اللي نهبوا العراق نهب!!.
ياناس المواطن يعرف كل سلبيات الجماعة بأنهم لصوص وحرامية وجواسيس ويخدمون الأجنبي و مايقدمون أدنى شىء للعراق واحدهم كان حافي وتعال وشوف هسه يتعامل بملايين الدولارات عدا القصور و البساتين وحتى اليخوت بدول الخليج.
قبل الأنتخابات شفنا الأخوة وألأخوات المرشحات يجاملون المواطنين ويبدون بتوزيع بطانيات و قنادر و قمصان نوم وصوبات نفطية لشراء الاصوات!!... و اصحاب النفوس الضعيفة مرتاحين عالأخر ويحلفون بالطلاق يصوتون لصالح المرشح وهو وين أكو مثله بالبلد؟؟،ابن حمولة و يعرف قدر الشعب!!؟؟أما مصالح الشعب و الخدمات ابداً مو مشكلة!!.
يطلع بالتلفزيون ويحلف بكل الأئئمة انه يگص اصبعه اذا صوت هالمرة للحرامية والجواسيس والنتيجة كلها چذب ودجل وترجع حليمة لعادتها القديمة وتيتي تيتي مثل ما رحتي جيتي والنتجية لا حظت برجيلها ولا خذت سيد علي!!.
كل هذا ويگوللولي هذا تسودن( انجن) ومايسكت ، ياترى ليش وشلون أسكت!!؟؟
يا أخي مايخالف صوت وانت حر بصوتك ولكن صوت للي يستاهل صوتك واللي تقتنع انه عراقي اصيل ويخاف على مصلحة العراق وممكن يفيد المجتمع، بس ويه من تحچي ويه حاج احمد آغا؟؟؟.
آلآف البشر من البصرة الى بغداد يعوفون كلشي و يجتمعون گدام نصب الحرية بباب الشرجي ابغداد!! يابة شكو؟؟
ها چا ماسمعت؟؟ القائد أمرنا أن نتظاهر ونعلن استكارنا تجاه العدو الصهيوني ولازم انحرر القدس ولايمكن أن نبقى مكتوفي ألأيدي للأبد؟؟!!.
مكتوفي الأيدي ولك منعول الوالدين؟؟ ماتروح ادجيب لگمة لعائلتك ومادگولي شلون تحرر القدس من باب الشرجي وانت جوعان وعريان ماشايل حتى مصيادة؟؟.
وهو سماحة السيد يعرف تاريخ وجغرافية القدس لابل حتى دربونة الحنانه؟؟ لو فقط عرض عضلات و الضحك على الذقون؟؟ وعلى عناد الخزعلي و العامري والحكيم و الأخ المالكي ابو اسراء الورد و الميلشيات الوقحة!!؟؟..
من جهة اخرى هناك مجاميع ما لها اية علاقة بالعراق ولا بأهل العراق ياخذون الأوامر من وراء الحدود ودين و ايمانهم سماحة المرشد الأعلى وبس.
زين اخوان خلونا انصير اكثر صراحة وأنوجه الهم كم سؤال:
- انتم هالطاعة العمياء من وراها تاخذون أموال من ايران؟؟.
- طيب .. يمنحوكم الجنسية الأيرانية يوم الشدة؟؟.
- يحترموكم و يستقبلونكم بأحترام في طهران؟؟.
- وعشرات الأسئلة وكل ألأجوبة... كلاااا.
حالة موطبيعية..معقولة اكو هيچي ناس تكره شعبها ووطنها وتعمل للأجنبي؟؟ ياترى التجسس والخيانة شلون تصير؟؟ ومع ذلك دا أنشوف واحدهم ايراني اكثر من الأيرانيين؟؟.
خلوني ساكت ترة اعرف سوالف ما تسولف وحق الحق!.
هذه ذكرتني بسالفة قديمة ، طبعا هذه ما تنطبق على العراقيين الأصلاء وما أكثرهم لله الحمد بل أقصد اللي ينطبق عليهم سالفتي وبس:
والحكاية بعنون( كلب الحايك)....

في يوم من الأيام هجم ذئب على قرية أغلبهم (مربين أغنام) فهرعت كلاب القرية خلف الذيب وهو يركض وهي تركض خلفه.
بعد وقت تعبت الكلاب ورجعت للقرية إلا كلب واحد ظل يطارد الذئب حتى تعب الذئب فوقف وسأل الكلب :أنت كلب صاحب الغنم؟؟ فقال الكلب لا.
أنت كلب شيخ القرية؟؟ فقال الكلب لا
أنت كلب ابن الشيخ؟؟فقال الكلب لا.
فقال الذيب :أنت كلب من اذا؟
فقال انا كلب الحايك.
فساله الذئب والحايك عنده غنم؟؟ فقال لا حتى صخلة ماعنده!!..
فقال له الذئب والغنامه لما يذبحون يعطونك عظم أو لحمه؟؟ فقال الكلب لا . يعطون كلابهم بس!.
فقال له الذيب :ياكلب ياابن الكلب اليوم اسويك ثريد وعبرة لكل كلاب الديرة لاحقني ومفحط وراي والحايك صخلة ماعنده و ما محصل شي من الغنامة!!..
رباط السالفة
أكو ناس يدافعون عن بعض الشخصيات دفاع شرس بدون فائدة ترجى لهم من وراء ذلك . وهم ذابحهم الجوع والحرمان حتى صخله ماعندهم ..يعني متل كلب الحايك؟؟؟ .
شفتوا اخوان!! هساع افتهمتم قصدي ، الأخ لاشغل ولا عمل و چمالة ولا خدمات تذكر وابنه حافي والمدارس تعبانة ومستشفيات الحكومة هابياض والأخ يصوت لنفس الحرامية لابالله كلب الحايك احسن منهم!!.
الى اللقاء بسالفة اخرى اذا الباري خلانه طيبين.
أخوكم
رئيس التحرير

• التالي >