وإذا لابس عمامه؟؟أسمعوا كلامه ، لاتحكموا على مظهره ترة دجال و أكبر كلاوچي!!

التفاصيل

تم إنشاءه بتاريخ الثلاثاء, 11 آذار/مارس 2025 10:28

كتب بواسطة: جلال چرمگا

وإذا لابس عمامه؟؟أسمعوا كلامه ، لاتحكموا على مظهره ترة دجال و أكبر كلاوچي!!

الكلاو والكلاوچية مصطلح يستخدمها اهلنا العراقيين للشخص المحتال واللي عايش عالحيلة فيطلقون عليه تسمية كلاوچي!! والأمثلة هواية ماشاءالله وطننا مليان بالكلاوچية والتفنن بالكلاوات في المقدمة(بعض رجال الدين) يستغلون مكانتهم والناس السذج يصدگوهم وكلمته ماتصير اثنين ، أما الأخوة السياسيين النشامى فعين الحسود بيها عود واحدهم من البيضة كلاوچي و نص!!.!.
معقولة لاسمح الله يكذب!!.
عمي هذا جده رسول الله دشوف وجهه كله نور وبركة.
صدگوني عمامته تخلي الواحد صافن والله اول ماشفته عرفته كله خير وبركة.
أخوية فطحل بالسياسة بحيث يطلع المارد من القمقم و مصدر الدجلة والفرات من ايران وبعد فترة انگوم انصدر كهرباء لدول الجوار!!!.
دتعال فهم حجي احمد اغا..!! عمي كفيكم الله هذوله واحدهم اكبر كلاوچي وكل تصرفاتهم كلاوات في كلاوات ، شوية فكروا شوفوهم زين اكو شىء بكلامهم بيها منطق و مصداقية و معرفة؟؟ ، عمي هذولي يستغلون طيبتكم وبساطتكم والا واحدهم مايعرف الچك من البوك لابالديانه ولا بالدنيا والأخرة ولا بالسياسة والتأريخ والجغرافية مجرد كل كلامهم خزعبلات و كذب في كذب و كلاوات من الدرجة الاولى!!.
للأسف بعد احتلال العراق من قبل الشيطان الأكبر والفرس المجوس جابوا الآف الكلاوچية وجهوهم ومنحوهم الصلاحية بنشر كلاواتهم من كلام فارغ و كلاوات الها اول ومالها أخير ومنحوهم مناصب بالدولة ما كانوا يحلمون بيها ولابالخيال وحتى اكو كم واحد منهم يحمل شهادة أو عنده ممارسة بالأدارة أو الأقتصاد والسياسة ، لكن هذه كلها أمور ثانوية لا تقدم ولا تأخر(كونهم أقلية) المهم تعلم من جماعته أن يتفنن بالكلاوات نعني أنصاب بفايروس الكلاوات!!.!!.
أما رجال الدين(اللي يستلمون الأوامر من قم وطهران) فهذولة واحدهم كلاوچي زمانه يصرحون بأمور وقصص خيالية وينسبوهه لأهل البيت( رضوان الله عليهم) وكلها خيال وكلاوات والمصيبة ماكو واحد شجاع ويوكفهم عند حدهم ويگول:
مولانا كافي شعوذة وكلاوات انتم ليش تسيئون الى سمعة أهل البيت (رضوان الله عليهم) وين اكو هيج كلام والأمثلة بيك خير وتدلل ، مثلا :
احدى الأحصنة اللي بنوها الألمان (خلال الحرب العالمية الثانية) بوجه قوات الحلفاء رادت تسقط وقوات الحلفاء الا شوية يحتلون هذا المكان الحساس و هنا قائد المنطقة شال تلفون على هتلر واخبره بالمخاطر وكان رد الأخير:
ولايهمك بس اذكر يا حسين راح يبتعد الحلفاء ويصير طشارهم ماله والي و فعلا بعد ان انتهت المكالمة بمجرد ان طبق قول هتلر احترگت المنطقة و المدرعات تتطاير بالهوا ومابقى ولاجندي للعدو وانتصر الألمان خلال ثوان!!.
مولانا والله العظيم الأمام الحسين( رض) أكبر من هالخزعبلات و الكلام الفارغ ، هذا كله كلام أمخربط ولغاية في نفوسكم المريضة!!..
الطمة الأكبر اللي يحكمون حاليا من رئيس الوزراء ونزولا للوزراء و ذوي المناصب العليا واحدهم كأنه أمصدگ وساكت كون تبيان الحقيقة راح تفشل كل كلاوات ملالي ايران وخطتهم!!.
الجماعة عارفين كلش زين بأنه وين أكو هيچ حچي اللي كله كلاو وكلاوات بس مجبورين حتى لاتفشل الخطة وينكشفون لذلك ساكتين واحدهم مثل الصنم لاكلام ولا رأي بالقضية..!
أغلب أصحاب المناصب العليا شهاداتهم من سوگ مريدي ، منهم يحمل ماجستير أو دكتوراه بالكلاوات وتعين بمناصب عليا وهو كلش زين يعرف بوضعه و اصحاب القرار هم يعرفون بوضعه بأنهم أكبر كلاوچية ومزورين مع ذلك ما يتجرأون ويفاتحوهم بالحقيقة كون هم هم كلاوچية وهنا اختلط الحابل بالنابل و صايرة لخة!!.
هنا تذكرت سالفة قديمة خلي نقراه سوية وهي تنطبق على كلاوات جماعة المنطقة الخضراء واحزابهم وقادة ميليشياتهم دون أستثناء:
كلاوچية و زولية
اكو قرية مال كلاوچية گاعدين لا شغل ولا عمل عايشين عالكلاوات فد يوم واحد منهم گال لربعه راح اجيبلكم شغلة نعيش منها العمر كله!!.
گالوله :توكل يامعود استعجل ترة الجوع كتلنة!!.
اكو قصر مال ملك بالولاية راح هذا الكلاوچي للقصر طب عالملك سلم عليه و گاله : يا ملكنا احنا القرية الفلانية و احنا شغلتنا نحوك زوالي و نريد نحوكلك زولية خيالية وماتتقدر بثمن!!.
الملك گال: ما محتاجين زوليتك القصر متروس زوالي.
گاله :ملكنا الزولية إلي نحوكها الك تختلف عن كل الزوالي اليمك!!.
گاله : عجيب! ، شلون يعني؟
گاله :ملكنا احنا نخلي وي الصوف مواد بحيث الزولية ما يشوفها ابن الحرام بس ابن الحلال يشوفها!!!.
تعجب الملك و صدگه!!.
المهم اتفقوا على السعر و چان السعر كلش ثگيل و اتفقوا شهر و تخلص الزولية ،ورا شهر اجى الكلاوچي هو و ربعه واحد يمشي ورا الثاني و چفوفهم بمستوى چتافاتهم كأنما شايلين شي و همه كلشي ما شايلين!! ،طبوا للقصر نزلوا اديهم و دفعوا الهواء كأنما يفرشون زولية !!.
وزراء الملك ظلوا واحد يگول للاخر عاشت اديهم و الثاني يگول ألوانها حلوة و الثالث يگول شغلها مرتب وعاشت ايدكم على هالتحفة الرائعة!!.
الكلاوچي وجه كلامه للملك وگال:
ها ملكنا شلونها الزولية؟؟؟
الملك اخذله صفنه گال اخاف احچي و يگولون ابن حرام!!!.
المهم گال :عاشت إيدكم وبالعافية عليكم الفلوس تستاهلون أكثر فعلا عملكم تحفة وما اعتقد أكو ملك على الكرة الأرضية عنده هيج زولية!!.
هاي بعد رباطها يمكم أعزائي القراء!!.
واني أريد أضيف وأگول:
ياجماعة الخير صدگوني كلاوچية الزولية موجودين بالعراق ومنتشرين بكل مدينة من العاصمة الى اصغر بلدة متونسين ومنتعشين ويلعبون بملايين الدولارات على حساب الناس الغلابة اللي كلش زين يعرفون الشغلة ومابيها كلها كلاوات في كلاوات بس واحدهم صاير مثل بلاع الموس ولذلك اختاروا السكوت وخلي الجماعة ياكلون بصاية خوالهم ملالي قم وطهران!!.
الى اللقاء بسالفة جديد اذا الله انطانا عمر ..وياربي شوكت نخلص من هالكلاوچية؟؟ مع ذلك ارد واگول مابقى شىء وينكنسون الى مزبلة التاريخ وحينها يطلع خياسهم ويايابة على كلاواتهم اللي تشيب الراس.ولا تنسون سلمولي على چبير الكلاوچيه و اتباعه وجالسيه و معاونيه و مريديه ...!.
أخوكم
رئيس التحرير

• التالي >