اويلي ع الفقير احاه يا ويلي

التفاصيل

تم إنشاءه بتاريخ الأحد, 28 كانون2/يناير 2018 08:48

كتب بواسطة: ميسون نعيم الرومي

ميسون نعيم الرومي

اويلي ع الفقير احاه يا ويلي

صرّنـَه لحم هاليوم فجرونـَه
الله وكبر ياوطن بالساحة ذبحونه
خلصوه النفط ياشعب جـَـوعونه
يادم الفقيـر الرخص يا ويلي
عمت عيني عَ الشباب
انهدم حيلي
ساسة ابلا بخت .. يا ناس ضيعونه
اتفـّـقوا وي بعض .. يا دنيه باگونه
اختلفوا عَ اللغف .. ياالله كتلونه
ويلي اعله اليتيم اشلون يايابه
منهو اليعينه اليوم بـِمـصابه
اويلاه يا يابه
ام الشهيد اشلون ياويلي
آنه اعله الفقير
انهدم حيلي
اتحـَـزّم يا شعب إگـّعـِد اوحاسبهم
ايجدّي بالدول خو گبل واحدهم
صوتك لوعله .. قوَّه انت ترعبهم
موت اوفكر .. ضيم اوقهر
دمنه جره صاير نهر
ذل اومهانه يابشر
اويلاه يا ويلي
آنه عَ الشباب
انهدم حيلي
احسب يا شعب وانوب احسبهه
اديانه من چذب هالناموْ ابسدهه
اصحه يا شعب واگعد اوزلزلهه
باگوْ خبزتك .. تنتخب ليردهه
دم الشهيد ايصيح .. يا يمـَّه
لحمه منتشر معجون وابدمـَّه
اصحه ياشعب واسجنهه هاللمه
أويلي عَ الشهيد احاه يا ويلي
اويلي ع الشباب انهدم حيلي
ابچي ع الفقير احاه يا ويلي
عمت عيني عَ الشباب
انهدم حيلي
----------------------------------------
قال مدير عام صحة مدينة الرصافة، الدكتور عبدالغنى الساعدى،
إن حصيلة التفجير المزدوج بواسطة انتحاريين اثنين استهدفا صباح اليوم 15/1/18
مجموعة من العمال فى منطقة ساحة الطيران وسط بغداد،
ارتفعت إلى 30 قتيلا و90 جريحًا"، مؤكدا أن الرقم قابل للزيادة.
https://www.youtube.com/watch?v=qIp1EpSlsDI
----------------------
16 / كانون الثاني / 2018
ســـــــتوكهولم