لو يعدموني مثل زلخا أباب الشرجي أظل أگول الحق و ما أخاف /٤

التفاصيل

تم إنشاءه بتاريخ الجمعة, 24 نيسان/أبريل 2026 17:07

كتب بواسطة: أبو حمودي البغدادي

أبو حمودي البغدادي

لو يعدموني مثل زلخا أباب الشرجي أظل أگول الحق و ما أخاف

-أبو حمودي اليوم شايل جريدة ، خير؟؟
والله تعرف بى انا مالي شغل بجرايد هالأيام ولا بقنوات فضائياتهم.
-لعد شني قصة هالجريدة؟؟
والله اخوية خليني أگعد و أشربلي استكان چاي و احچيلك.
-چاي وماي لأبو حمودي.. بس من راس القوري!
الف رحمة على ذاك الأب الطيب.هاك واقرالي هذا الخبر اللي بيها وثيقة دامغة و ما تقبل غلط وبالمناسبة ترة هذه الجريدة مالتهم نعني الأخوة الحرامية.
-قبل ما أقرأ الخبر شعجب ناشرين الخبر في الوقت الذي كلهم حرامية؟.
هاااه .. خوش سؤال.. أخوية مو الجماعة صايرين ناس تغار من ناس لسببين:
اولا: كون يعرفون نهايتهم ويريدون يصيرون خوش اوادم ويضحكون على الناس الغلابة.
ثانيا: الحسد ، يگولك شعجب حصلوا على هالملك وأحنا لاء؟؟.
-أبختي تمام.. جيب الجريدة.. أيباااخ .. يامعود صدگ؟؟چذب؟؟؟.
دقرأ خلي يسمعوك كل اللي بالگهوة...حجي رحمة على والديك شوية نصي الراديو خلي الكل تسمع!.
هاي شنو ؟؟ أكيد شغلة ما تخش بالعقل.. يگولك يا محفوظ السلامة؟
قطعة أرض مساحتها ٣٠٠٠ متر مربع في وسط مدينة النجف وتُقدر قيمتها ٣٠ مليار دينارتُباع بسعر عشرة الاف دينار فقط الى مؤسسة شهيد المحراب!!!
يامعودين أخاف الخبر مال قبل خمسين سنة!!
-لا عيوني لاء..تعال وشوف ويه الخبر وثيقة و اسماء و تواقيع و الشغلة أمرتبة على سنكة عشرة ومن غير نقاش!!.
ابو حمودي رحمة على والديك.. عشرة الاف دينار يعني كم دولار فقط!.
طبعا لعد شعبالك لعد تتذكرون قبل كم سنة من باعوا ارض ( جامعة البكر) بفلس ونص لأحد الحرامية؟؟
أخوية هم شخلوا ابغداد وبقية المحافظات ما سرقوها وسجلوها بأسماء اهاليهم واقاربهم.
عمي الله وكيلكم ولاية بطييييخ ونص... اللي ما يصدگ خلي يجي يشوف الوثيقة..
مع الأسف على عراقنا ، اللي بناه الباشا نوري السعيد واللي بعده كله راحت صدگ لو گالوا:

" يامن تعب يامن شگه يامن على الحاضر لگه"

جيبلي حامض ترة راح اطگ وأموت!!!!لحد يستغرب اذا بعد كم يوم سمعنا باعوا نصب الحرية اباب الشرجي!!!.