الملكة أدگول:استفيدوا من خبرات حكومة وبرلمان العراق حتى لاتنهار عملتنا و جواز السفر!!

التفاصيل

تم إنشاءه بتاريخ الأحد, 04 تشرين2/نوفمبر 2018 11:32

كتب بواسطة: جلال چرمگا

الملكة أدگول:استفيدوا من خبرات حكومة وبرلمان العراق حتى لاتنهار عملتنا و جواز السفر!!

بعداحتلال العراق من قبل الشيطان الأكبر وفتح الأبواب للأخوة من الجمهورية الأسلامية ومثل ما شفنا شعلوا الضؤ الأخضر بكلشي و كلاشي:

- اهلا وسهلاً بكل الأخوة عملاء ايران وخلوهم يستلمون أعلى المناصب وألاهم رئاسة الحكومة ووزارة الداخلية!!.
- ماكو مانع دخلوا اطنان من المخدرات الى المدن المقدسة ومنها الى بقية العراق !.
- قتل وخطف كل العلماء وكبار القادة ولاتنسون الأطباء واساتذة الجامعات والقضاة والطياريين!!.
- دخلوا كل الأغذية الفاسدة حتى تنتشر كل الأمراض في المقدمة السرطان!.
- اسرقوا ، اغتالوا ، خربوا العلاقات ويه دول الجوار !!.
- اعتمدوا في المناصب الحكومية والبرلمان على حملة الشهادات المزورة اللي صادرة من الجامعات الأيرانية ولابأس بشهادات سوگ مريدي وفي كل الأختصاصات!!.
- ضعفوا الجيش وقوى الأمن الداخلي وذلك بتشكيل ميليشيات تأخذ اوامرها من ملالي ايران واجهزتهم الأستخباراتية و على رأسهم الأخ ومهجة القلب سليماني وبطانيته!!.
- اختاروا وين ما أكو أمي وأنطوهم مناصب في مجال الأعلام حتى يخربوا ماتبقى من السمعة والأحترام!!.
- احتقروا النسوان واختاروا الدلالات و صاحبات البسطات بسوگ العورة و سوگ زاير چخيور بالأماكن الحساسة وأنطوهن مجال بالظهور على شاشات التلفزيون والأستفادة من الكومشنات!!.
بناء على خبرات هالكفاءات هالشكولات الزفرة لابد أن تستفاد الدول المتقدمة من هالكوادر حتى تتقدم أكثر وأكثر.. لندن اللي مستعمراتها ما كانت تغيب عنها الشمس ،لازم يتحركون حتى يجلبون أنظار الدنيا الها (بعد أن فقدت بريقها بسبب هيمنة أمريكا على العالم) وهذه موجودة في العراق فقط اللي أثبتوا انهم بأمكانهم ان يخلوا بريطانيا حديث الساعة ليل نهار !!.

اليكم المفاجئة السارة:
مصادر موثوقة جدا!! قالت ان رئيسة وزراء بريطانيا ( تيريزا ماي ) طلبت اذن من الملكة بتعيين عدد من الكفاءات العراقية( كلش للوحة) في التشكيلة الوزارية الجديدة بلندن!!.
- في المقدمة براهام جافري( وتقصد سماحة السيد ابراهيم الجعفري) بسبب كفائته في قيادة الدبلوماسية والأهم لغته الشكسبيرية والذي يغرد كأنه بلبل أنگليزي!!. ووجوده يخلي الأتحاد الأوربي في دوامة بحيث راح تصير مدينة باريس عاصمة هولندا و وروما عاصمة الدنمارك و نهر سين موجود في وسط مدينة زيورخ السويسرية!!وساعة بيغ بن موجودة في الصين و محمد علي كلاي بالأصل من مدينة مشهد الأيرانية وتاج محل موجود في اثيوبيا!!.
الملكة هزت براسها (دلالة على موفقتها ) ووگفت شوية واشرت لرئيسة الوزراء ان تقترب شوية وهمست:
لاتنسين الليدي / اليا ناسيف ، وتقصد البرلمانية الفلتة ( عالية نصيف) وتعينها مديرة لمكتبها في ( 10 داوننغ ستريت) حتى تخوف وزرائها ومايستغلوها كونها إمرأة ورئيسة وزراء، والله بس تخنزر على اكبر شارب تخلي يتراجع فوراً ويطلب المعذرة وإلا راح يعرف شراح يصير به !!.
وأقترحت الملكة المستر اباس بيتي، وتقصد (عباس البياتي) متحدث اعلامي بدرجة وزير وذلك بسبب فصاحته والأبتسامة المرسومة على وجهه الجميل أربع وعشرين ساعة!!.
وأقترحت أن تبطل كل أفراد الشرطة والحماية ورجال الأمن في رئاسة مجلس الوزراء وتعيين الليدي هنان فتلوي ، وتقصد النائبة السابقة (حنان الفتلاوي ) ولكن بشرط!!.
رئيسة الوزراء چانت كلها اذان صاغية وهزت براسها دلالة على موافقتها فوراً!!.
گالت الملكة:
الشرط يا محفوظة السلامة أن تبقى بنفس ملابسها اللي كانت تظهر بيها على شاشات التلفزيون باليوم اربع مرات زائدأ عباية عراقية بشرط أن تلف العباية على خصرها( تخيلوا المنظر) وسلموها توثية براسها طوبة من الگير الأسود كلش و وگفوها بالباب وانطوها صلاحية مطلقة بالضرب و بكل انحاء جسم أي وزير حتى لو تأخر عن الأجتماع دقيقة واحدة!!.
الله وكيلكم اذا الأجتماع الساعة بالعشرة كل الوزراء راح يتواجدون من الساعة ثمانية لو گبل هالوقت.
يايابة شلون منظر (حنونة) لافة العباية وحاطة التوثية على چتفها وتروح وتجي بأنتظام گدام الباب والمصورين دگ صور وشحد واحد منهم يتقرب منها أمتار وإلا راح ياخذ نصيبه من رشقة من التوثية واكيد الضربة الأولى بالراس والله وياك عبوسي ، أنشاءالله كسر بالجمجمة ، منو گاله يقترب مايقرا اللافتة المكتوب عليها:
لاتقترب من الجدار وإلا ذنبك على جنبك!!.
وأكيد قصد الملكة كلش واضح من الناحية الأقتصادية لأن ألأخت (حنونة) راح أتصير بمكان عشرين من افراد شرطة وصطعش مخبر سري وهالراوتب كلها تعود للدولة.
اكيد وافقت رئيسة الوزراء ولكن كان عندها ملاحظة صغيرة :
ان لا تسوي علاقات وية الوزراء وتأخذ منهم كومشنات ودلالية وبالتالي تتسامح وياها وأدخلهم( جوة العباية!!) حتى لو تأخروا ساعة عن الأجتماع.
وافقت الملكة فوراااااااااا!!.
وأخيرا كانت للملكة أقتراح أخير:
لا تنسي المستر گابر سولغ ، وتقصد( جبر صولاغ) راقبت هذا الرجل هواية بالضبط مثل الطماطة يرهم بكل شىء ، أقترح اولا حطوا وزير للأسكان وبعدين للنقل وبعدين للداخلية و للمالية وبالأخير أنطوا أدوار كوميديه وية الممثل (مستر بين) كونه كوميدي درجة اولى حسب قوله، ولكن بشرط:
أن تفتشوا سيارته كلش زين ،أخاف شايل بصندوگ السيارة منشار لو دريل كهربائي! ، ترة اذا سمحتوله ياخذ راحته راح يسگط نص الشعب الأنگليزي!!.
يا جماعة الخير:
صرنا مضحكة للناس، عشنا وشفنا وبعد أنشوف وعمركم طويل انشاءالله!!.
الى سالفة أخرى أودعناكم عيوني..
أخوكم
رئيس التحرير

• < السابق
• التالي >