عراقية أنا..

التفاصيل

تم إنشاءه بتاريخ السبت, 30 آب/أغسطس 2014 06:38

كتب بواسطة: حذام الحداد

حذام الحداد
 

عراقية أنا

يالتســأَل عليْ وانتَ أَدرَه ْ بالـحال

حزينة الروح مِن يوم الوطن عفته ْ

غَريبة دار  تـدري وشبـَعتْ هـموم

ونهش گلبي الحزن والفرَح ماضگته

خلصْ عمري إبَّچي وبوداع الاحباب

وعلى خدّي الدمع من دمــاي أكتَّه

وأشوفن  ناســه تنـذبح كل يــوم

والطائفيَّه من الشعب باگتْ ضحكْته

مثل مركب يهيــم بـلــَيــَّه اشراع

وقبطانه حاير بـيـه ْ ومتَيِّه وَجـهتَه

ماتبَّدل حاله وبقه نفس ذاكَ الحال

ومابيهم المـَد ْ إيده ينـشَّف دَمعته ْ

نفس ذاك الضيم بس تغيِّرَت الوجوه

وچماله هالارهاب صَب عليه لَعنْتَه

شگد حـلمتْ نـردْ لديارنـه بيـوم

وأشوف الــوطن خلصانـه محنـتـه ْ

وأرتوي بماي دجلة وأغتسل بيه

وأگـعد على ضـفافه وبـفيـَّة نخلته

وأشكي جرحي لكل هلي الطيبين

عله سيف الغربة الشلَّتني طعنته

أثاري چنِتْ أبـني عالوَهمْ آمــال

وعن بالي الحلم من گاعه شلتـَه ْ

عـراقيـَّة أَنا وبـس بالأسم ظلـّيت

مشردة والاغراب تتنعَم ْ إبجنــته ْ

ياوسفه عفنه الوطن بيد اليجزرون

وكل واحد يتاني من الذبح حصته

گلــّي يــازَمـنْ مـنّا بَـعــَد شـتـريــد

ماكَفــّاك من ْ عمرنه اللي أَخذتـه ْ

كافي مو بينَه لعَبتْ أشكال وألــوان ْ

 صبَرنهْ صبرْ أيوب والصبر إمتحنتهْ

وأدعي عله الخلانَه بــهاذه الــحال

 مِن عَساها إن شـالله بـحظَّه وبَخته ْ

الگاردينيا:الشاعرة الرقيقة/ حذام الحداد.....