حچاية التنگال ١٥٥

التفاصيل

تم إنشاءه بتاريخ الإثنين, 05 تشرين2/نوفمبر 2018 21:46

كتب بواسطة: د.سعد العبيدي

                          د.سعد العبيدي

حچاية التنگال ١٥٥

آني ما أدري وانته ما تدري، وأكيد همه ما يدرون السمچ بمناطق الحلة صبح مزوهر. ليش بس هنا زوهر، وبس بأحواض النهر زوهر، وليش أكثر الأحواض تابعة للمتنفذين وأصحاب اليمين.
محد دا يعرف زوهر بفعل فاعل، لو مرض من الله صابة، لو مؤامرة دبرها الاستعمار والرجعية؟. الله وحده هو العالم.
تدرون صارت حزورة وبالبلد منشورة، محد يگدر يحلها ولا أحد يعرف أصلها منين.
ويبين صعبة على كل هاي المؤسسات والدوائر الحكومية وأهل العقل والراي أن يعرفون ليش واشلون وهذا البلاء منين. وتدرون لحد اهنا ممكن واحد يلصم حلگه بحجارة ويسكت، ويخليها على القضاء والقدر حتى يقتنع، لكن لمن توصل الحچاية الى الاعلام الي يگول والجرايد الي تكتب أنو دول تشاركنا التفتيش عن أسباب موت السمچ مال الأحواض من السدة وجاي، هاي الي ما أعتقد أكو أحد يجرعها ولا راح يگدر يسكت عليها.
أگول لعد كل هذوله الخريجين مال البيطرة والزراعة والكيميه والسيطرة والقسطرة وين يروحون، حملة شهادات الدكتوراه بالآلاف وين يروحون، شنو نشف العراق، الله وأكبر؟. تره أبد ما معقوله.
المعقولة وحده من اثلاثة، لو الخريجين ما يفتهمون، لو الـ يفتهمون ما يشتغلون، لو الـ يشتغلون ما يخلوهم يشتغلون.
أكول لعد إذا الخيل انبشمت والحمير صابها البلابوش والهوش انطحلت والغنم انتخمت اشراح تسوون. اني أگلكم شتسوون، أقتراح نقدم عريضه مليونيه للحكومة نطالبها تنطي العراق مقاولة لشركة چبيرة هي تديره وتجيبلنه الوارد صافي راس الشهر وإحنه نخلي رجل على رجل مثل تنابلة السلطان، مو أحسن من دوخة الراس.