لتـصـدگ بخايــن مـرَّه بـاعــك

التفاصيل

تم إنشاءه بتاريخ الإثنين, 16 كانون1/ديسمبر 2013 16:12

حذام الحداد

لتـصـدگ بخايــن مـرَّه بـاعــك

والبـاع برخص يبيع ألـف مـرّه

يسرَّك و أسراره تحطهه أبير
و يمشي وبالهوه سرَّك يذره

موصاحب الياخذ غيبتك بگفاك
ولا صاحب اليطعن صاحبه بظهره
 
ولا صاحب إلدَوَّر مصلحه ويَاك
وبالشــدايـد منـك ركض يتبــرَّه

وشما وفيت وسهلت  ممشاه
يغدر بيك وبدربك يحط عــثـره
 
مثل فحل التوت بس هيبـه تلگاه
ولا تتـرجه منـه تنـطرح ثـمـره

ولو طحت يـوگف ويَّ اليذبحون
ويـكَمّْل ذبحــك أبسچيـن غــدره

ويـكيّف من يشوف الحزن جارك
ويسگيك من كاس الشماته زهر مرَّه

الضرس من يالمك والدوه ميفيد
ماتــرتاح ألا تقــلعه مــن جــذره

ومو كلمن يبچيك تـظـنَّـه ردي
ولا كلمن يضَحْكك تـمشي بأثْـره

چثير من الخلگ طبع الضبع بيهه
وبـثياب الــحمل تـلگـــاها مـدَّثره

وأبو طبع الردي لاتظنْ منّه يجوز
وطبع البـيـه غير الچفـَـن مَيغيره