ياحيف الوطن الناس جاعت بيه

التفاصيل

تم إنشاءه بتاريخ الخميس, 09 كانون2/يناير 2014 20:35

حذام الحداد

ياحيف الوطن الناس جاعت بيه
ومن ماله الغريب إنملت چياسه
مو كافي الدول تدگ عليه دوم
بابــه مشرعه وگاعه منداسه
والجيران من كل كتر تنهش بيه
وصارت وجعتــه إلهم ونــاسه
والعراقي اللي تحمل جور لسنين
وجان بسده وي اخوته حراسه
حاله تـرده وصار حالــه الضيم
من كثر اللهث انگطعت أنفاسه
غده حافي وابنه تارك التـعليم
ماعنـده إلــه يشتري كرّاســه
حِلم بس بالأمان وشلون يتحقق
اذا ألتهت عنه بمناصبهه الساسه
ونـفط الوطن صــار كوام سلاح
فوگ الجوع يتفجر على راسه
ياريت النفط هالغضب ماموجود
ماچان العراقي انضام لو قاسه