جحا البغدادي وهذه النكتة...الحمار الأستاذ!!

التفاصيل

تم إنشاءه بتاريخ الجمعة, 20 أيلول/سبتمبر 2013 15:17

                       الحمار الأستاذ

ذهب احد المواطنين الى سوق بيع الحمير لشراء حمار يعينه على هذه الشدة في التنقل في بغداد وصارت السيارة التي اشتراها بملايين الدنانير غير ذات فائدة.

دخل محل البيع وسلم على صاحبه وتفرس في الحمير الموجودة، فوقع نظره على حمار لطيف صغير فقال في نفسه ( هذا خوش مطي على كدنا ويمكن سعره رخيص) سأل صاحب المحل ( حجي هذا المحروس بيش؟؟ ) قال ( مليون دينار)..

رد المواطن: حجي موهوايه ؟؟..

قال البائع ( لاموهوايه، هذا زغير ومايأخذ مكان بالبيت وأكله قليل ومايحتاج دجه حتى تصعد عليه، ويفوت بين السيارت بسهولة )..

فنظر الرجل يمينا ويسارا فوجد حمار اكبر من الاول، فسأل البائع:

( حجي هذا بيش ؟؟)..

قال البائع (مليونين دينار)..

قال المواطن (شدعوه شنو مواصفاته حتى يكون سعره هالقد عالي).

فقال البائع: (عيني هذا يشيلك انت والعائلة، وتكدر تحمل عليه كيسين تمن او طحين وما يكول آخ، بعدين ما يجوعر ولايفشق بالشارع، ويعبر من الاشارة الضوئية ويحترم قانون المرور)..استغرب المواطن ونظر واذا بحمار يقف بعيدا فقال المواطن للبائع:

( حجي هذاك الواكف هناك بيش ؟ )

فرد البائع: (ثلاثة ملايين !!!!) فصاح المواطن بحرقة:

(ليشششش . شنو مواصفاته حتى يكون بهالسعر الغالي؟؟)

فرد البائع :

( والله عيني هذا كل مواصفات ماعنده، بس كل ذوله الزمايل يصيحوله أستاذ!!! )..