الى روح أمي

التفاصيل

تم إنشاءه بتاريخ الأربعاء, 17 أيلول/سبتمبر 2014 19:48

كتب بواسطة: حذام الحداد

حذام الحداد

الى روح أمي

عگب عينچ ييمة شلّي بالروح

ماتـرّاد دنيه أنتِ  مــو بـيــهه

يمه من شـلتي وهجرتي البـيت

ليش وياچ روحي ماأخـذتـيهه

شكثر تـــمنيت آنــه بمكانـــچ

ولا عيني عليچ بيوم أبچيــهه

يريحة طيب ريحة جنة بالگاع

شنهو ريحتچ بس گولي وصفيهه

حزنت عليچ حزن الگاع للماي

من تعطش قوي وتجف سواگيهه

وحزن عليچ الكون والجيران

والــركبــان لمن حده حاديـــهه

وبلابل سدرتنه التغنّي طول لنهار

أنگلب غناهه نواح بساعة العفتيهه

دموعي على ذكرچ تصب نهران

وحگ رب السمه ماسيطر عليهه

تجيلي بطيف چَمْ ليــلة واگــلچ

ليش الغيبة يحبـيــبـة تطولــيهه

وشيــلــتـچ  أم ريــحة  الهيــل

كل ليــلة حــدر راسي أخـليـهه

عشـر سنين مــن رحْتِ للـيـوم

عزاچ بروحي الماگدرت أداويهه

كل وجعـــات الگـــلب ألهَهْ دوهْ

ووجعـة فراگچ مافاد الدوه بيهه

عمت عينك يموت أشكثر مكروه

شصار لو مريت من يمهه ومخطيهه

يانظر عيني أنا بكل ساعة أدعيلچ

وأگولن ربي من رحماتك أنطيهه

وأصبر نفسي لأن أوفاها حگهه

من حط الجنة كلهه تحت رجليهه

الگاردينيا:الشاعرة الرائعة/ حذام الحداد