بلادي مو بلادك ..

التفاصيل

تم إنشاءه بتاريخ الخميس, 06 تشرين2/نوفمبر 2014 17:56

كتب بواسطة: مثنى عبيدة

مثنى عبيدة

هي بلادي مو بلادك

هي ارض أجدادي مو اجدادك

كل شبر بيه أسلافي فمنو أسلافك ؟؟

 

هي بلادي مو بلادك

ياالغريب يلي وجهك أصفر مثل أصفارك

مسموم أذا سكتت وأذا نطقت أقوالك

ولك انا العراقي شنهو حسبالك

أسكُت .... لو أنسى داكت أخوالك

لو ما أعرف منهوه أعمامك

تاريخكم معروف واعرف شنو لجرالك

لو نسيت نزالي ونزالك ؟؟؟

 
 

هي بلادي مو بلادك

من قرون وأنت تخاف من خيالك

اذا ذكروا العراق تتلفت مجنون عبالك

يجي يوم تتحاسب على أفعالك

وحتى ما يتنكس أنعالي لضربك بنعالك

أكسر ظهرك و أنعنع أضلوعك وأزلامك

وأصيحن حيل .. هذا زماني مو زمانك

يالغريب منين متكون وشكد غربانك

نور الله  يطفي نيرانك

دروح ولي وسد بيبانك

واكضيها وي شيطانك

ـــــــــــــــــــــ

يا عراق يجي يوم يتعدل ميزانك

وتعود الفرحة وتهجر أحزانك

ترجع اللمة حلوة بإحضانك

عراقيين هم كل ألوانك

اخويه أبن الجنوب كلنا أخوانك

وأبو الغربية يا محلى صحبتك وصحبانك

سهول العراق ...الله .. الله ..على جمالك

جبالنا العالية وكوردستانك

دجلة ..فرات.. وهور وبادية و وديانك

طيبة ومحنة عرب كورد تركمانك

كلنا والطيبين يضمنه بمحبة ديوانك

ونقول نحبك يا من فدوة لقربانك

ربي كل الاديان أديانك

أنت الاله الواحد سبحانك

أحفظ العراق يارب سبحانك

أحميه بنورك وقوتك وسلطانك

أحميه بنورك ورحمانك

ــــــــــــــــــــــــــــــــــــــــــ

مهداة الى كل اهل العراق الاصلاء أينما كانوا

ـ كتبت من وحي حوار جرى مع الأخت ساجدة بنت تلكيف ومعها رجل من مسيحيي العراق تحاورنا عن ما يجري فقلت الأخت العراقية ساجدة

بلدك ثم بلدك ثم بلدك

نعم أنها بلادنا بلادي وليخرج كل ظالم غريب من بلادي

العراقي

مثنى عبيدة حسين