تغرَّبنه

التفاصيل

تم إنشاءه بتاريخ الخميس, 30 نيسان/أبريل 2015 19:22

كتب بواسطة: حذام الحدّاد

حذام الحدّاد

تغرَّبنه

 

تغرَّبنه .....والغربه شكثر مرّه

نجر حسرات والحسره بأثر حسره

أتركنه الوطن وأرواحنه مكدرة

غدرنه الزمن بأفعاله الرديّه


علَ فراگك ياوطن الروح متوجعه

مذلولين وكاس الذل منو يجرعهْ

خوفي يطول بعادنه وماالنه رجعهْ

جذوري بگاعك تنادي عليّه



يمته نعود ونتهنّه بحلو صبحك

فيروز التغني والشمس إِلك تضحكْ

وشوفك تشفه ويبره من الألم جرحك

ريتك تشفه ويصير الجرح بيّه



دورنه بكتار الكون شرقه وغربه

تعبنه ومالگينه وطن مثلك نحبه

يبو النهرين فرگاك شكثر صعبه

على وصالك ترد الروح ليّه



كبرنَه بعاد عنــك مو بــيدينه

وبسيرتك صبح ومسه ينوّر حجينَه

عگب عينك يغالي شصار بينَه

وبعدنه نتباهى بهويتنه العراقيه



يالساكن بنص الگلب وساكن صبا عيني

تعبني لفراگ وذبت من شوگي وحنيني

أونْ توالي الليل  طيفك لو يجيني

ونّه مبينه  وونّه خفيّه



يخلي أمشي نرد للوطن ونعود

ذبلن هروش الگلب ماظلْ فرد عود

أحنه أهل الأرض ولسومر نعود

خوفي بالغربه توافينه المنيه