ما ظلت غيرة ولا محنة ولا جار

التفاصيل

تم إنشاءه بتاريخ الخميس, 21 أيار 2015 15:39

كتب بواسطة: مثنى عبيدة

مثنى عبيدة

ما ظلت غيرة ولا محنة ولا جار

 ما ظلت غيرة ولا محنة ولا جار
 
من يوم راحت الموصل والأنبار
 
وين أهل العمارة والعشار
 
وين أهل كربلاء ونجف الكرار
 
أهل العشاير مضيفين الخطار
 
وين أهل المال والتجار
 
وين أهل العراق الأبرار
 

ترضى مروتكم هذا العار ؟؟

بيوتنا تنسبي بيد التتار  


كبار متبهذلة ونسوان وصغار
 
صدك صرنا سالفة بالأخبار ؟
 
صدك تريد كفيل من أهل الدار ؟؟؟؟
 
صدك تسد الباب وتقيم الأستار ؟
 
بوجه أهلنا العراقيين الأخيار
 
هو هيج تعالج الانكسار
 
شلون ينبني الوطن وتتفتح الأزهار ؟
 
شلون تريد مني الاستمرار ؟؟؟؟
 
بالوحدة وأنت تختلق الأعذار
 
الوطن خوة ومحبة وإصرار
 
على الرحمة والتعايش بالأفكار
 
لا تلغيني ولا ألغيك لا تحتار
 
آلاف السنين مضت مو أعشار
 
من دجلة وللفرات والجبل والثرثار
 
كلها حسب ونسب وأصهار
 
بنينا البيت من دمنا والأحجار
 
صار قبلة بالعلم والأخوة والازدهار
 
هسه صفينا مطشرين طشار
 
تضحك علينا الاوادم والجوار
 
 طكت أرواحنا ولا ظلت أسرار
 
شنكول باجر للأحفاد والزوار
 
أنقتلوا البشر ونسرقت الآبار
 
أتهدمت المساجد والكنائس والآثار
 
آي لا ضربنا زلزال ولا إعصار
 
ولا نووي ولا غبار
 
بس الوطن ضيعوه الأشرار
 
اللي ما عندهم غيرة ولا حرمة الجار
 
تروحون ما مطوله الأعمار
 
ورآكم القبر  والخزي والنار  
 
لن ما عندك غيرة ولا نخوة ولا جار
 
بعد ما يسوى العتب والكلام والأشعار
 
من ضاع العراق أبو الثوار
 
يا رب يا عالم بالحال يا قهار
 
أرحم أهلنا العراقيين الأطهار
 
ارحم يا رب أهل العراق الأطهار
ــــــــــــــــــــــــــــــــــــــ
21 / 5 / 2015 م