"بالك ياشعب تنسه وتعيد الراح"

التفاصيل

تم إنشاءه بتاريخ الجمعة, 28 شباط/فبراير 2014 17:19

حذام الحداد

بالك ياشـعب تنْسَه وتعيد الراح

ولا تنـتخب اللي ماوفَه بـــوَعدَه

عانيت أشكثُر من چذب الوعود

وأظن جرحك چبير ويلگچمك بَعدَهْ

لاتنطي صوتَك للي ضامَك سنين

وإحذرْ للـغِدَرْ چفَّـــك تــــــمدّه

ولتصَدْگ الإجَه ورافع شِعارات

وكل همَّه عله الكرسي تـگعدَه

ولتغرّك صورهم تارسه الحيطان

من سببهم الوطن وضعَهْ تردَّه

يدگْـلَكْ الصَدر ويگـلَك آنه هنا

وما تلگاه وكتْ الضيگ والشدَّه

بيــتَك مهدَّم وهُو يعمر قصـور

وبلع مال الشَـعب ونِهَـب كدَّه

وفوگ الفـقـر يوميَّه إنفجارات

دگلّي أشفت من عمرك العدَّه

انتخب إبن الفرات ودجلة والأهوار

وإبن بغداد والرمادي والسـدَّه

والشريف العدَّه غيره عالوطن

وللخيـر يشْمر ساعده وزندَه

إنت ابن البطل الذاد بالجبهات

المادنَّگ الهامه وما وطَه مجده

جوز منهم يكفي شبَعْت هموم

وباب اليجيـب الريح  ســــدَّه

بيدَك ياعراقي تقلَع الصبّيـــر
وبيدَك جَرحَك تعالِجه وتضَمدَه