عتب الى عراقي

التفاصيل

تم إنشاءه بتاريخ الأربعاء, 16 تموز/يوليو 2014 21:16

كتب بواسطة: حذام الحداد

حذام الحداد

عتب الى عراقي

أريد أعتب ْعاللي شرب

ميَّة النهرين

الچان وَيْ جاره أهل

وصفو متفرقين

والنِسَهْ العِشرَه ْوالملح

أوصدگ الواشين

الأنذال الهدَّو عالبلد

وللفتن متحزمين

شاعَو الفرقَهْ لجِل

يبقون متسَيدين

ولجِل يقسمون الوطن

وبنفطَه طمعانين

وشعبي إنذبح ذبح الإبل

بسم الله والدين

إنكتل الإسمهْ عمر

وإنكتل لإسمَه ْحسين

ودم العراقي إنهدر

وغرَّگ الصوبين

ياوسفه چنتو أمس

إخوة ومتحدين

بالجبهات لاويتو العدو

إسنين وسنين

وأخيَّك من نزف

اگطعتْ الشرايين

وهديتْ دمَّك إلَهْ

وشالَه إلكْ دين

شِجاك اليوم ياشعبي

متگلّي رايح وين...

كركوك أخذهَهْ مسعود

والبصره إلمَنْ زين؟؟

لأَمريكه لو لإيران

لو نقسمهَه عالأثنين؟

گاعك إهي عرضك تره

احْفظهه بالعينين

گبل لتندَمْ والنَدم

ميفيد بعدين