عامود البيت

التفاصيل

تم إنشاءه بتاريخ الثلاثاء, 06 تشرين2/نوفمبر 2012 19:24

عامود البيت

يـگلي  شلون أذا أچه أمر الله والگدر

 

وأني خمس سنين عمري وأختي سنة و چم شهر

 

بعدنه ما نعرف نشرب الماي ويبللنا المطر

 

وأهلنا بعيدين عبرت .. ألاف أميال ونهر

 

ودنيانا وحشة ...  بالبيت لو بالسفر

 

لان أنت ماگو يا عامود البيت والفخر

 

يا بويه يا حياتنا  وشمسنا والگمر

 

وإذا صرصت الريح وسقط الشجر

 

نبرد و ماگو حضن  ودعاء  وسور

 

باقية بخيالي أحچاياتك والصور

 

لمن تشيلني وتضمني رغم جراحك والقهر

 

تحميني من گلشي خطر

 

تفديني بروحك تتلگه الشرر

 

تگلي المهم أنت سالم من صروف الدهر

 

عيش حياتك وافرح وسط البشر  

 

الدنيا مال وعيال .. بنات وولد صالح أنذكر

 

أريد راسك مرفوع چنك صكر

 

ولا تگعد مع اللي بهمته فتر

 

ولا تصير مجرد واحد نفر

 

أريدك ساعي للخير مع گلمن سعا وصدر

 

وجودك بينهم فارس  وبيك عددهم  كثر

 

ولا تمشي بدروب ضيقة وما بيه ممر

 

لان درب الشر گلمن مشاه خاب وخسر

 

وليدي أنا مو أول واحد مات أنقبر

 

صير گوي وگون مع من صبر

 

لا تهزك ريح وحچي گلمن غدر

 

أريدك وتد قوي مو بهزه أنكسر

 

دعيت الله بدعاء زكريا وإبراهيم اللي نحر

 

فدوه لوليده اللي طاع ربه وما أمر

 

أشوفك بعيوني وأحملك وحطك على الحجر

 

لا تگطع صلة رحم ولا تكون ممن بتر

 

جذره وأصله وضاع بين البشر

 

وقسى گلبه وأصار چنه صخر

 

 

أبشر يا بويه سمعاً وطاعة وكل حرف أنحفر

 

بقلبي وعقلي يا من منك أحلى العبر

 

لأن المحبة والذل فاز بيها من سار و حزر

 

للأم اللي من صبرها الصبر أصطبر

 

والأب اللي  بيه كل الفخر

 

خاب وخسر اللي لحقهم خائن وهدر

 

أبوك وأمك يا سامعي ترى بيهم كل الفخر

 

أبوك وأمك يا سامعي ترى بيهم كل الفخر

 

ـ  مستوحاة من سؤال ودموع ولدي الحارث رعاه الله .


ـ  مهداة إلى كل المغتربين عن الأهل والوطن ولما لهم إلا الله .


6 / 11 / 2012 م